ജനപ്രിയ നായകൻ ദിലീപിനെ നായകനാക്കി ബി ഉണ്ണികൃഷ്ണൻ രചിച്ചു സംവിധാനം ചെയ്ത കോടതി സമക്ഷം ബാലൻ വക്കീൽ എന്ന ചിത്രത്തിന്റെ ട്രൈലെർ രണ്ടു ദിവസം മുൻപേ റിലീസ് ചെയ്തിരുന്നു. ഗംഭീര പ്രേക്ഷക പ്രതികരണം നേടിയ ഈ ട്രൈലെർ ഇപ്പോഴും പ്രേക്ഷകരുടെ കയ്യടി നേടി സോഷ്യൽ മീഡിയയിൽ തരംഗമായി തുടരുകയാണ്. രസകരമായ പ്രകടനവുമായി ദിലീപ് തന്നെയാണ് ട്രൈലറിൽ കയ്യടി നേടുന്നത്. വിക്കനായ ഒരു വക്കീൽ ആയാണ് ദിലീപ് ഈ ചിത്രത്തിൽ പ്രത്യക്ഷപ്പെടുന്നത്. വിക്കി വിക്കിയുള്ള അദ്ദേഹത്തിന്റെ ഡയലോഗ് ഡെലിവെറിയും ട്രെയിലറിലെ കോമഡി രംഗങ്ങളുമൊക്കെ പ്രേക്ഷകരെ ഏറെ രസിപ്പിക്കുന്നുണ്ട്. എന്നാൽ കോമഡി മാത്രമല്ല, കിടിലൻ ആക്ഷനും സസ്‌പെൻസും എല്ലാം നിറഞ്ഞ ചിത്രമാണ് ഇതെന്ന സൂചനയും ഈ ട്രൈലെർ നൽകുന്നു.
ഒരു കോമഡി ത്രില്ലെർ ആയിരിക്കും ഈ ചിത്രം എന്ന സൂചനയും ട്രൈലെർ നൽകുന്നു. വയാകോം 18 ആദ്യമായി മലയാളത്തിൽ നിർമ്മിക്കുന്ന ഈ ചിത്രത്തിൽ മമത മോഹൻദാസും പ്രിയ ആനന്ദും ആണ് നായികമാർ ആയി എത്തുന്നത്. സൈജു കുറുപ്പ്, അജു വർഗീസ്, സിദ്ദിഖ് , രഞ്ജി പണിക്കർ തുടങ്ങി ഒരുപാട് പ്രശസ്ത നടൻമാർ ഈ ചിത്രത്തിന്റെ താര നിരയിൽ ഉണ്ട്. അഖിൽ ജോർജ് ഛായാഗ്രഹണം നിർവഹിച്ച ഈ ചിത്രം എഡിറ്റ് ചെയ്യുന്നത് ഷമീർ മുഹമ്മദും ചിത്രത്തിന് സംഗീതം ഒരുക്കിയത് രാഹുൽ രാജ്, ഗോപി സുന്ദർ എന്നിവർ ചേർന്നുമാണ് . മാഫിയ ശശി, റാം, ലക്ഷ്മൺ, സ്റ്റണ്ട് സിൽവ, സുപ്രീം സുന്ദർ എന്നിവർ ചേർന്നാണ് ഈ ചിത്രത്തിന് വേണ്ടി സംഘട്ടനങ്ങൾ ഒരുക്കിയിരിക്കുന്നത്.
