പലതരത്തിലുള്ള ടീസറുകള്‍ നമ്മള്‍ കണ്ടിട്ടുണ്ട്. സ്പീഡ് കട്ടുകളും താരങ്ങളുടെ മാസ്സ് എന്‍ട്രികളും അങ്ങനെ പല വിധങ്ങളില്‍. എന്നാല്‍ പതിവില്‍ നിന്നും വ്യത്യസ്ഥമായൊരു ടീസര്‍ ഒരുങ്ങുകയാണ്. വിഷ്വലുകളില്‍ നിന്നും മാറി ശബ്ദത്തിലൂടെ ഒരു ടീസര്‍. അതാണ് ടൊവിനോ തോമസ് നായകനാകുന്ന തരംഗത്തിന് വേണ്ടി എത്തുന്നത്.
ദൃശ്യത്തിന് പകരം ശബ്ദത്തിന് പ്രധാന്യം നല്‍കി ഒരു ടീസര്‍ സിനിമ ലോകത്തിന് പുതുമയുള്ളതാണ്. വ്യത്യസ്ഥമായ ഒരു മാര്‍ക്കറ്റിങ് രീതി തന്നെയാണ് ഇതിലൂടെ തരംഗം ടീം അവതരിപ്പിക്കുന്നത്.
സിനിമ ചരിത്രത്തില്‍ ആദ്യമായി ഒരു ടീസര്‍ ഒരു എഫ്‌എം സ്റ്റേഷന്‍ വഴി പുറത്തു വിടുന്നു എന്ന പ്രത്യേകത കൂടെ തരംഗത്തിന് ഉണ്ട്. റെഡ് FMലൂടെ നാളെ വൈകുന്നേരം 6 മണിക്കാണ് തരംഗത്തിന്‍റെ ടീസര്‍ എത്തുക.
വൈകുന്നേരം 7 മണി മുതല്‍ ഫേസ്ബുക്ക്, യൂടൂബ് തുടങ്ങിയ സോഷ്യല്‍ മീഡിയകളിലും ടീസര്‍ ലഭ്യമാകും എന്ന്‍ ചിത്രത്തിന്‍റെ അണിയറ പ്രവര്‍ത്തകര്‍ അറിയിച്ചു.
നവാഗതനായ ഡൊമിനിക്ക് അരുണ്‍ സംവിധാനം ചെയ്യുന്ന തരംഗം നിര്‍മ്മിക്കുന്നത് തമിഴ് സൂപ്പര്‍ താരം ധനുഷും മിനി സ്റ്റുഡിയോയും ചേര്‍ന്നാണ്.
