നടൻ കൃഷ്ണകുമാറിന്റെ മകൾ അഹാന കൃഷ്ണകുമാർ ഒരു നടി എന്ന നിലയിൽ ഇപ്പോൾ കേരളത്തിൽ പ്രശസ്തയായി വരികയാണ്. രാജീവ് രവി സംവിധാനം ചെയ്ത ഞാൻ സ്റ്റീവ് ലോപ്പസ് എന്ന ചിത്രത്തിൽ ഫർഹാൻ ഫാസിലിന്റെ നായിക ആയാണ് അഹാന മലയാളത്തിൽ അരങ്ങേറ്റം കുറിച്ചത്. അതിനു ശേഷം ഹൃസ്വ ചിത്രങ്ങളിലൂടെയും മറ്റും ശ്രദ്ധ നേടിയ അഹാന ഈ അടുത്തിടെ നിവിൻ പോളി നായകനായ ഞണ്ടുകളുടെ നാട്ടിൽ ഒരിടവേള എന്ന ചിത്രത്തിലും പ്രധാന വേഷത്തിൽ അഭിനയിച്ചിരുന്നു.
ഇപ്പോൾ ഇതാ അഹാന തന്റെ പുതിയ മ്യൂസിക് വീഡിയോ ആൽബവുമായി എത്തിയിരിക്കുകയാണ്. സൗത്ത് ഇന്ത്യൻ ലേഡി സൂപ്പർ സ്റ്റാർ എന്നറിയപ്പെടുന്ന ബാഹുബലി നായിക അനുഷ്ക ഷെട്ടി ആണ് ഈ മ്യൂസിക് വീഡിയോ ഒഫീഷ്യൽ ആയി ഇന്ന് വൈകുന്നേരം ആറു മണിക്ക് റിലീസ് ചെയ്തത്.
കാട്രെ എൻ വാസൽ വന്താൽ, കാട്രിൻ മൊഴി എന്നീ രണ്ടു തമിഴ് ഗാനങ്ങളും , കാറ്റേ നീ വീശരുതിപ്പോൾ എന്ന മലയാള ഗാനവും ഉള്ള ഈ മ്യൂസിക് വീഡിയോ ആൽബത്തിലെ ഗാനങ്ങൾ ആലപിച്ചത് അഹാനയും അതോടൊപ്പം വർക്കി ആൻഡ് ഫ്രണ്ട്‌സ് എന്ന മ്യൂസിക് ബാൻഡ് മെമ്പേഴ്സും ചേർന്നാണ്. ശ്യാമ പ്രസാദ് എം എസ് സംവിധാനം ചെയ്ത ഈ മ്യൂസിക് വീഡിയോക്കു വേണ്ടി ദൃശ്യങ്ങൾ ഒരുക്കിയത് നിമിഷ് രവി ആണ്. അഹാന അടുത്തതായി നായിക ആയെത്തുന്ന ചിത്രമാണ് ലുക്കാ. ടോവിനോ തോമസ് നായകൻ ആയി എത്തുന്ന ഈ ചിത്രത്തിന്റെ ക്യാമറാമാനും നിമിഷ് രവി ആണ്.
ഈ അടുത്തിടെ അഹാനയുടെ സഹോദരിമാർ നൃത്തം ചെയ്ത ജിമ്മിക്കി കമ്മൽ റീമിക്സ് ഡാൻസ് വീഡിയോ സോഷ്യൽ മീഡിയയിൽ വൈറൽ ആയിരുന്നു.
