മലയാളത്തിന്റെ മഹാനടന്മാരിൽ ഒരാളായ സിദ്ദിഖ് ഇപ്പോൾ തെലുങ്ക് ചിത്രത്തിലും അഭിനയിക്കുകയാണ്. അഗ്നിനക്ഷത്രം എന്ന് പേരിട്ടിരിക്കുന്ന ഈ ചിത്രത്തിലെ സിദ്ദിഖിന്റെ കാരക്ടർ പോസ്റ്റർ പുറത്തു വന്നു കഴിഞ്ഞു. ബാലരാമവർമ്മ എന്ന കഥാപാത്രമായി കിടിലൻ ലുക്കിലാണ് സിദ്ദിഖ് ഈ ചിത്രത്തിൽ പ്രത്യക്ഷപ്പെടുന്നത്. പ്രശസ്ത തെലുങ്ക് നടി ലക്ഷ്മി മൻചു നായികാ വേഷം ചെയ്യുന്ന ഈ ചിത്രത്തിൽ ലക്ഷ്മിയുടെ അച്ഛനും പ്രശസ്ത തെലുങ്ക് നടനുമായ മോഹൻ ബാബുവും അഭിനയിക്കുന്നുണ്ട്. ലക്ഷ്മി മൻചുവിന്റെ മൻചു എന്റെർറ്റൈന്മെന്റ്സ്, മോഹൻ ബാബുവിന്റെ ശ്രീലക്ഷ്മി പ്രസന്ന പിക്ചേഴ്സ് എന്നിവർ ചേർന്നാണ് ഈ ചിത്രം നിർമ്മിക്കുന്നത്. പ്രതീക് പ്രജോഷ് ആണ് ഈ ചിത്രം തിരക്കഥയൊരുക്കി സംവിധാനം ചെയ്യുന്നത്. ഗോകുൽ ഭാരതി ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് മധു റെഡ്ഢി, ഇതിനു സംഗീതമൊരുക്കുന്നത് ലിജോ കെ ജോസ് എന്നിവരാണ്.
ആദ്യമായാണ് ലക്ഷ്മിയും അച്ഛൻ മോഹൻ ബാബുവും ഒരുമിച്ചഭിനയിക്കുന്നത് എന്ന പ്രത്യേകതയും ഈ ചിത്രത്തിനുണ്ട്. എന്നാൽ ലക്ഷ്മി ബാലതാരമായിരുന്നപ്പോൾ അച്ഛൻ വേഷമിട്ട ചിത്രത്തിൽ പ്രത്യക്ഷപ്പെട്ടിട്ടുണ്ട്. ഏതായാലും അച്ഛനൊപ്പം അഭിനയിക്കുന്നതിൽ മകളും, മകൾക്കൊപ്പം അഭിനയിക്കുന്നതിൽ അച്ഛനും ഏറെ അഭിമാനവും ആവേശം കൊള്ളുന്നുണ്ടെന്നു അവരുടെ പ്രതികരണങ്ങൾ വ്യക്തമാക്കുന്നു. ഈ വർഷം മലയാള സിനിമയിലും ലക്ഷ്മി മൻചു അരങ്ങേറ്റം കുറിക്കുന്നുണ്ട്. മലയാളത്തിന്റെ മഹാനടൻ മോഹൻലാൽ നായകനായി എത്തുന്ന വൈശാഖ് ചിത്രം മോൺസ്റ്ററിൽ ആണ് ലക്ഷ്മി മൻചു വേഷമിട്ടത്‌. ഉദയ കൃഷ്ണ രചിച്ച ഈ ചിത്രം ഇപ്പോഴതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. അഗ്നിനക്ഷത്രം സിദ്ദിഖിന്റെ രണ്ടാമത്തെ മാത്രം തെലുങ്ക് ചിത്രമാണ്. ഒൻപത് വർഷം മുൻപാണ് അദ്ദേഹം തന്റെ ആദ്യ തെലുങ്ക് ചിത്രം ചെയ്തത്.
