മമ്മൂട്ടി നായകനായി എത്തുന്ന ഒരു കുട്ടനാടൻ ബ്ലോഗിന്റെ സെറ്റിൽ ആയിരുന്നു സംഭവം നടന്നത്. ഇന്നലെ നടന്ന ഷൂട്ടിങ്ങിനിടെ ആയിരുന്നു രസകരമായ ആ സംഭവം. ചിത്രത്തിൽ മമ്മൂട്ടിയുടെ കൂടെ അഭിനയിക്കുന്ന യുവതാരങ്ങളായ സഞ്ജു ശിവറാം, ഗ്രിഗറി, സഹീൻ സിദ്ധിഖ് എന്നിവർ ഇന്നലെ സെൽഫി ചോദിച്ചു മമ്മൂട്ടിയുടെ അരികിലേക്ക് ചെന്നു. ഉടൻ തന്നെ അദ്ദേഹം അവർക്ക് സെൽഫി നൽകുകയും ചെയ്തു ആ രസകരമായ സെൽഫി ആണിപ്പോൾ സോഷ്യൽ മീഡിയയിൽ ചിരി പടർത്തുന്നത്. സെൽഫി നൽകിയ മമ്മൂട്ടി തന്റെ ഹെൽമറ്റ് ഉപയോഗിച്ച് മുഖം മറച്ചിരുന്നു. സെൽഫി ചോദിച്ചിട്ട് തൃപ്തിയായി എന്ന അടിക്കുറിപ്പോടെയാണ് സഞ്ജു ശിവറാം ചിത്രം പങ്കുവച്ചിരിക്കുന്നത്. ചിത്രത്തിൽ മമ്മൂട്ടി ബൈക്കിൽ സ്റ്റൈലൻ ലുക്കിൽ എത്തുന്ന ചിത്രങ്ങൾ ഇന്നലെ പുറത്ത് വന്നിരുന്നു അതിനിടെയാണ് പുതിയ രസകരമായ വാർത്തയും വരുന്നത്.
സേതു ആദ്യമായി സംവിധാനം ചെയ്യുന്ന ചിത്രമാണ് ഒരു കുട്ടനാടൻ ബ്ലോഗ്. മല്ലു സിങ്, അച്ചായൻസ് തുടങ്ങി ഒരുപിടി ഹിറ്റുകൾ സമ്മാനിച്ച എഴുത്തുകാരൻ ആണ് സേതു. മുൻ ചിത്രങ്ങൾ പോലെ തന്നെ ചിത്രം ഹാസ്യത്തിന് ഏറെ പ്രാധാന്യം നൽകിയാണ് ഒരുക്കുന്നത്. നാട്ടുകാരുടെ പ്രിയങ്കരനായ ഹരിയേട്ടന്റെ കഥയാണ് ചിത്രത്തിലൂടെ പറയുന്നത്. യുവാക്കളുടെ പ്രശ്‌നത്തിൽ ഇടപ്പെട്ട് പരിഹാരമുണ്ടാക്കുന്ന ഹരിയേട്ടന്റെ ഉറ്റ സുഹൃത്തുക്കൾ ആയാണ് സഞ്ജു ശിവറാമും, ഗ്രിഗേറിയും ആദിൽ ഇബ്രാഹിമും എല്ലാം എത്തുന്നത്. അനു സിത്താര, ഷംന കാസിം, ലക്ഷ്മി റായ് തുടങ്ങിയവരാണ് ചിത്രത്തിലെ നായിക വേഷം കൈകാര്യം ചെയ്യുന്നത്. പി. കെ മുരളീധരനും ശാന്ത മുരളീധരനും നിർമ്മിച്ച ചിത്രം ഈ വർഷം പകുതിയോടെ തീയറ്ററുകളിൽ എത്തും.
