തമിഴകത്തിന്റെ ഷോമാൻ എന്നറിയപ്പെടുന്ന ഷങ്കർ ഇപ്പോൾ രണ്ട് ചിത്രങ്ങൾ ഒരുക്കുന്ന തിരക്കിലാണ്. റാം ചരൺ നായകനായ പുതിയ ചിത്രമാണ് അതിലൊന്ന്. കിയാരാ അദ്വാനി നായികാ വേഷം ചെയ്യുന്ന ഈ ചിത്രത്തിൽ എസ് ജെ സൂര്യയും വേഷമിടുന്നുണ്ട്. അത് കൂടാതെ ശങ്കർ ഒരുക്കാൻ പോകുന്ന ചിത്രം ഇന്ത്യൻ 2 ആണ്. ഉലകനായകൻ കമൽ ഹാസൻ നായകനായി എത്തുന്ന ഈ ചിത്രത്തിന്റെ ഷൂട്ടിംഗ് ഉടനെ ആരംഭിക്കും. ഈ രണ്ടു ചിത്രങ്ങളും ഒരേ സമയം ഷൂട്ട് ചെയ്യാനുള്ള പ്ലാനിലാണ് ഷങ്കർ. ഇന്ത്യൻ 2 ലെ കമൽ ഹാസന്റെ ഉൾപ്പെടെയുള്ള നിർണ്ണായക രംഗങ്ങൾ ഷങ്കർ ഷൂട്ട് ചെയ്യുമ്പോൾ, സഹതാരങ്ങളുടെ സീനുകൾ ഷൂട്ട് ചെയ്യാൻ, വസന്തബാലൻ, ചിമ്പുദേവൻ, അറിവഴകൻ എന്നിവർ സഹായികളായി എത്തുമെന്ന് വാർത്തകളുണ്ട്. ഇപ്പോഴിതാ മറ്റൊരു ബ്രഹ്മാണ്ഡ ചിത്രത്തിന്റെ പണിപ്പുരയിലാണ് ശങ്കറെന്ന വാർത്തകളാണ് വരുന്നത്.
തമിഴിലെ പ്രശസ്ത നോവലായ വേൽപാരിയെ അടിസ്ഥാനമാക്കി ആയിരം കോടി ബഡ്ജറ്റിലാണ് ഈ ചിത്രമൊരുക്കുകയെന്നാണ് സൂചന. നടിപ്പിൻ നായകൻ സൂര്യ ഇതിൽ നായകനായി എത്തുമെന്നാണ് ആദ്യം വാർത്തകൾ വന്നതെങ്കിലും, ഇപ്പോൾ വരുന്ന സ്ഥിതീകരിക്കാത്ത വാർത്തകൾ പറയുന്നത് കെ ജി എഫ് താരം റോക്കിങ് സ്റ്റാർ യാഷിനെ കൂടി അണിയറ പ്രവർത്തകർ ഇതിലെ നായകനായി അഭിനയിക്കാനുള്ള ഓഫറുമായി സമീപിച്ചിട്ടുണ്ടെന്നാണ്. ബോളിവുഡ് സംവിധായകൻ കരൺ ജോഹർ, പെൻ സ്റ്റുഡിയോസ്, നെറ്റ്ഫ്ലിക്സ് എന്നിവർ ചേർന്നാകും ഈ ബ്രഹ്മാണ്ഡ ചിത്രം നിർമ്മിക്കുകയെന്നും റിപ്പോർട്ടുകൾ പറയുന്നു. ഏറെ പുരസ്‍കാരങ്ങൾ നേടിയിട്ടുള്ള സു വെങ്കടേശൻ രചിച്ച വേൽപാരി എന്ന വലിയ നോവൽ, സംഗം കാലഘട്ടത്തിൽ നടക്കുന്ന കഥയാണ് പറയുന്നത്. വെളിർ വംശത്തിന്റെ രാജാവായ വേൽപാരിയുടെ ഭരണകാലത്തിന്റെയും പോരാട്ടങ്ങളുടെയും കഥ പറയുന്ന നോവലാണിത്.
