മലയാളത്തിന്റെ മെഗാസ്റ്റാർ മമ്മൂട്ടിക്ക് 2022 ഒരു മികച്ച വർഷം ആയിരുന്നു. 2010 ന് ശേഷം ഒരു മമ്മൂട്ടി ചിത്രം മലയാളം ഇയർ ടോപ്പർ പദവി നേടിയ വർഷമായിരുന്നു 2022. അമൽ നീരദ് ഒരുക്കിയ ഭീഷ്മ പർവം ആണ് ആ നേട്ടം സ്വന്തമാക്കിയത്. അത് കൂടാതെ റോഷാക്ക് എന്ന നിസാം ബഷീർ ചിത്രവും ഒറ്റിറ്റി റിലീസ് ആയെത്തിയ പുഴു എന്ന ചിത്രവും മമ്മൂട്ടിക്ക് പ്രശംസ നേടിക്കൊടുത്തു. ഇപ്പോഴിതാ 2023 ലും തന്റെ മികച്ച സമയം തുടരാനുള്ള ശ്രമത്തിലാണ് അദ്ദേഹം. ഈ വർഷം മമ്മൂട്ടി അഭിനയിച്ചു ആദ്യം റീലീസ് ചെയ്യുന്നത് ലിജോ ജോസ് പെല്ലിശ്ശേരി ഒരുക്കിയ നൻ പകൽ നേരത്ത് മയക്കം ആണ്. ജനുവരി 19നാണ് ഈ ചിത്രം എത്തുക. കഴിഞ്ഞ ഡിസംബറിൽ കേരള അന്താരാഷ്ട്ര ഫിലിം ഫെസ്റ്റിവലിൽ പ്രീമിയർ ചെയ്ത് മികച്ച അഭിപ്രായങ്ങൾ നേടിയ ചിത്രമാണിത്.
അതിന് ശേഷം മമ്മൂട്ടി നായകനായി എത്തുന്ന റിലീസ് ബി ഉണ്ണികൃഷ്ണൻ ഒരുക്കിയ ക്രിസ്റ്റഫർ ആണ്. ഉദയ കൃഷ്ണ തിരക്കഥ ഒരുക്കിയ ഈ ത്രില്ലർ ചിത്രം ഫെബ്രുവരി രണ്ടാം വാരം റീലീസ് ചെയ്യുമെന്നാണ് ഇപ്പോൾ ലഭിക്കുന്ന സൂചന. 2023 ലെ മമ്മൂട്ടിയുടെ മൂന്നാം റിലീസ് തെലുങ്കിൽ നിന്നാണ്. സുരേന്ദർ റെഡ്‌ഡി ഒരുക്കുന്ന ഏജന്റ് എന്ന ചിത്രമാണത്. യുവ താരം അഖിൽ അക്കിനെനി നായകനായി എത്തുന്ന ഈ ആക്ഷൻ ത്രില്ലറിൽ മഹാദേവ് എന്ന് പേരുള്ള, മിലിട്ടറി ഓഫീസറായ ഒരു നിർണ്ണായക കഥാപാത്രമായാണ് മമ്മൂട്ടി അഭിനയിച്ചിരിക്കുന്നത്. പ്രശസ്ത സംവിധായകൻ ജിയോ ബേബി ഒരുക്കിയ കാതൽ എന്ന ചിത്രമാണ് പിന്നീടെത്തുന്ന മമ്മൂട്ടി ചിത്രം. മമ്മൂട്ടി തന്നെയാണ് ഈ ചിത്രം നിർമ്മിക്കുന്നത്. ഇപ്പോൾ മമ്മൂട്ടി നിർമ്മിച്ചു അഭിനയിച്ചു കൊണ്ടിരിക്കുന്ന പേരിടാത്ത റോബി വർഗീസ് രാജ് ചിത്രവും ഈ വർഷം തന്നെ റിലീസ് ചെയ്യും. മമ്മൂട്ടി പോലീസ് വേഷം ചെയ്യുന്ന ഈ ചിത്രവും ഒരു ത്രില്ലറായാണ് ഒരുക്കുന്നത്.
