മോഹൻലാലിനെ നായകനാക്കി ലിജോ ജോസ് പെല്ലിശേരി ഒരുക്കുന്ന മലൈക്കോട്ടൈ വാലിബൻ കഴിഞ്ഞ മാസം പതിനെട്ടിനാണ് ആരംഭിച്ചത്. രാജസ്ഥാനിലെ ജയ് സാൽമീറിലാണ് ഇതിന്റെ ഷൂട്ടിംഗ് ആരംഭിച്ചത്. ഇപ്പോഴിതാ ഇതിന്റെ പുതിയ ഷെഡ്യൂൾ പൊഖ്‌റാനിൽ ആരംഭിക്കാൻ പോവുകയാണെന്ന വിവരങ്ങളാണ് ലഭിക്കുന്നത്. ഇരുപത് ദിവസത്തോളമാണ് പൊഖ്‌റാനിൽ ഈ ചിത്രത്തിന്റെ ഷൂട്ടിംഗ് ഉണ്ടാവുക. ഏകദേശം എൺപത് മുതൽ തൊണ്ണൂറു ദിവസത്തോളം ഷൂട്ടിംഗ് ആണ് ഈ ചിത്രത്തിന് പ്ലാൻ ചെയ്യുന്നത്. രാജസ്ഥാൻ കൂടാതെ കൊച്ചിയിലും ഈ ചിത്രം ഷൂട്ട് ചെയ്യുമെന്ന റിപ്പോർട്ടുകളാണ് വരുന്നത്. ബിഗ് ബഡ്ജറ്റിൽ ഒരുക്കുന്ന ഈ ചിത്രത്തിന്റെ കഥ രചിച്ചത് ലിജോ ജോസ് പെല്ലിശ്ശേരിയും തിരക്കഥ രചിച്ചത് പി എസ് റഫീക്കാണ്. ഏപ്രിൽ മാസം പകുതിയോടെ ഈ ചിത്രത്തിന്റെ ഷൂട്ടിംഗ് പൂർത്തിയാകുമെന്നാണ് സൂചന.
മോഹൻലാൽ ഒരു പ്രായമുള്ള ഗുസ്തിക്കാരനായി വേഷമിടുന്ന ഈ പീരീഡ് ചിത്രത്തിൽ കാത്ത നന്ദി, രാജ്പാൽ യാദവ്, സോണാലി കുൽക്കർണി, ഹരീഷ് പേരാടി, ഡാനിഷ് സേഥ്, ഹരിപ്രശാന്ത്, മണികണ്ഠൻ ആചാരി, സുചിത്ര എന്നിവരും അഭിനയിക്കുന്നുണ്ട്. ഷിബു ബേബി ജോണിന്റെ ജോൺ മേരി ക്രീയേറ്റീവ്, സെഞ്ച്വറി ഫിലിംസ്, മാക്സ്‌ലാബ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് മധു നീലകണ്ഠൻ, സംഗീതമൊരുക്കുന്നത് പ്രശാന്ത് പിള്ളൈ, എഡിറ്റ് ചെയ്യുന്നത് ദീപു ജോസഫ് എന്നിവരാണ്. കാന്താര, കെ ജി എഫ് എന്നിവയുടെ സംഘട്ടനം ഒരുക്കിയ വിക്രം മോർ സംഘട്ടനമൊരുക്കുന്ന ഈ ചിത്രത്തിൽ ചില പ്രശസ്ത തെന്നിന്ത്യൻ താരങ്ങൾ അതിഥി വേഷം ചെയ്യുമെന്നും വാർത്തകൾ വന്നിരുന്നു. പൂജ റിലീസായി ആവും മലൈക്കോട്ടൈ വാലിബൻ പ്രേക്ഷകരുടെ മുന്നിലെത്തുക.
