ഇന്ന് രാവിലെ 9 മണിക്കാണ് ദിലീപ് ചിത്രമായ കമ്മാരസംഭവത്തിലെ പുതിയ പോസ്റ്റർ എത്തിയത്. പോസ്റ്റർ എത്തി മിനിട്ടുകൾക്കകം സോഷ്യൽ മീഡിയയിൽ വൻ തരംഗമാണ് സൃഷ്ടിച്ചിരിക്കുന്നത്. വയസായ കമ്മാരന്റെ ഗെറ്റപ്പിലാണ് ദിലീപ് പോസ്റ്ററിൽ പ്രത്യക്ഷപ്പെട്ടിരിക്കുന്നത്. ഇതിനു മുൻപ് കല്യാണരാമൻ എന്ന ചിത്രത്തിൽ വർഷങ്ങൾക്ക് മുൻപ് വൃദ്ധന്റെ ഗെറ്റപ്പിൽ ദിലീപ് പ്രത്യക്ഷപ്പെട്ടിട്ടുണ്ട് എങ്കിലും കമ്മാരസംഭവം ഗെറ്റപ്പ് അതിലും ഗംഭീരമായിരിക്കുന്നു എന്നാണ് പ്രേക്ഷക പ്രതികരണം സൂചിപ്പിക്കുന്നത്. ഈ ചിത്രത്തിന്റെ വേറെ മൂന്നു പോസ്റ്ററുകൾ നേരത്തെ പുറത്തു വരികയും വമ്പൻ പ്രേക്ഷക പ്രീതി നേടുകയും ചെയ്തിരുന്നു.
നവാഗതനായ രതീഷ് അമ്പാട്ട് സംവിധാനം ചെയ്ത ഈ ചിത്രം ദിലീപിന്റെ കരിയറിലെ ഏറ്റവും വലിയ ചിത്രമാണ്. മുരളി ഗോപി തിരക്കഥ രചിച്ച ഈ ചിത്രത്തിൽ തമിഴ് നടൻ സിദ്ധാർഥ്, മുരളി ഗോപി, നമിത പ്രമോദ് എന്നിവരും പ്രധാന വേഷത്തിൽ എത്തുന്നുണ്ട്. സിദ്ധാർഥിന്റെ ആദ്യ മലയാള ചിത്രമാണ് കമ്മാരസംഭവം. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച ഈ ചിത്രം ഗ്രാൻഡ് റീലീസ് ഈ വരുന്ന ഏപ്രിലിൽ കേരളത്തിൽ വിതരണം ചെയ്യും. ദിലീപിന്റെ കരിയറിലെ ഏറ്റവും വലിയ റീലീസ് ആയിരിക്കും ഈ ചിത്രം എന്നാണ് സൂചന.
