പ്രശസ്ത മലയാള താരം ജോജു ജോർജ് ആദ്യമായി അഭിനയിച്ച തമിഴ് ചിത്രമാണ് ധനുഷ് നായകനായ ജഗമേ തന്തിരം. കാർത്തിക് സുബ്ബരാജ് സംവിധാനം ചെയ്ത ഈ ചിത്രം ഡിജിറ്റൽ റിലീസ് ആയാണ് എത്തുന്നത്. ഒടിടി പ്ലാറ്റ്ഫോമായ നെറ്റ്ഫ്ലിക്സിൽ അടുത്ത മാസം റിലീസ് ചെയ്യാൻ പോകുന്ന ഈ ചിത്രത്തിന്റെ ട്രൈലെർ പുറത്തു വരുന്ന ദിവസവും നെറ്റ് ഫ്ലിക്സ് പ്രഖ്യാപിച്ചു കഴിഞ്ഞു. ഈ വരുന്ന ജൂൺ ഒന്നാം തീയതിയാണ് ജഗമേ തന്തിരം ട്രൈലെർ പുറത്തു വരുന്നത്. മലയാള നടി ഐശ്വര്യ ലക്ഷി ആണ് ഈ ചിത്രത്തിലെ നായികാ വേഷം ചെയ്യുന്നതെന്ന പ്രത്യേകതയും ഉണ്ട്. ഇതിനു മുൻപ് വിശാൽ നായകനായ ആക്ഷൻ എന്ന ചിത്രത്തിലൂടെ തമിഴിൽ അരങ്ങേറ്റം കുറിച്ച ഐശ്വര്യ ലക്ഷ്മി ഇപ്പോൾ മണി രത്‌നം ഒരുക്കുന്ന പൊന്നിയിൽ സെൽവൻ എന്ന ബ്രഹ്മാണ്ഡ ചിത്രത്തിലും അഭിനയിക്കുന്നുണ്ട്. ജോജു ജോർജിനെ സംബന്ധിച്ച് ഈ തമിഴ് ചിത്രം വലിയ ഒരവസരമായാണ് എത്തിയത്.
ജൂനിയർ ആർട്ടിസ്റ്റ് ആയി കരിയർ ആരംഭിച്ചു, സഹനടനായും വില്ലനായും ഹാസ്യ താരമായും എത്തി പിന്നീട് മലയാള സിനിമയുടെ നായക നിരയിലേക്ക് ഉയർന്ന ജോജു, ഇപ്പോൾ മലയാള സിനിമയുടെ പുതിയ തലമുറയിലെ ഏറ്റവും മികച്ച നടന്മാരിൽ ഒരാൾ കൂടിയാണ്. തമിഴ് സിനിമയിലും തന്റേതായ ഒരു മുദ്ര പതിപ്പിക്കാൻ ജഗമേ തന്തിരം എന്ന ചിത്രത്തിലൂടെ ജോജുവിന്‌ സാധിക്കും എന്ന് തന്നെയാണ് മലയാള സിനിമാ പ്രേമികളും ജോജു ആരാധകരും പ്രതീക്ഷിക്കുന്നത്. ജഗമേ തന്തിരം എന്ന ചിത്രത്തിൽ രണ്ടാമത്തെ കേന്ദ്ര കഥാപാത്രമായാണ് ജോജു അഭിനയിക്കുന്നത്. സന്തോഷ് നാരായണൻ സംഗീതം ഒരുക്കിയ ഈ ചിത്രത്തിലെ ഇതുവരെ റിലീസ് ചെയ്ത ഗാനങ്ങളെല്ലാം തന്നെ സൂപ്പർ ഹിറ്റുകളായി കഴിഞ്ഞു. ജൂൺ 18 നു റിലീസ് ചെയ്യാൻ പോകുന്ന ഈ ആക്ഷൻ ഗ്യാങ്സ്റ്റർ ഡ്രാമ നിർമിച്ചിരിക്കുന്നത് വൈ നോട്ട് സ്റ്റുഡിയോസിന്റെ ബാനറിൽ ശശികാന്ത് ആണ്.
