പ്രണയത്തിന്റെ ഒരു പുതിയ മുഖം ധൈര്യപൂർവം പ്രേക്ഷകരിലേക്ക് എത്തിച്ചു കൊണ്ട് വലിയ ശ്രദ്ധ നേടുകയാണ് മായാതെ എന്ന റൊമാന്റിക് മ്യൂസിക് വീഡിയോ. രണ്ടു സ്ത്രീകൾ തമ്മിലുള്ള പ്രണയമാണ് ഈ വീഡിയോ നമുക്ക് കാണിച്ചു തരുന്നത്. അവരുടെ പ്രണയ നിമിഷങ്ങൾ ഉൾക്കൊള്ളിച്ചു കൊണ്ട് ഒരുക്കിയിരിക്കുന്ന ഈ മ്യൂസിക് വീഡിയോക്ക് ഇതിനോടകം മൂന്നു ലക്ഷത്തോളം കാഴ്ചക്കാരേയും യൂട്യൂബിൽ നിന്ന് ലഭിച്ചു കഴിഞ്ഞു. ഗംഭീരമായി ഒരുക്കിയിരിക്കുന്ന ഈ മ്യൂസിക് വീഡിയോ ഇപ്പോൾ സോഷ്യൽ മീഡിയയിൽ വൈറലാണ് എന്ന് തന്നെ പറയാം നമ്മുക്ക്. കേതകി നാരായൺ, റിതു എന്നിവരാണ് ഈ മ്യൂസിക് വീഡിയോയിലെ പ്രണയിനികളായി അഭിനയിച്ചിരിക്കുന്നത്. വൈശാഖ് കെ പി സംവിധാനം ചെയ്തിരിക്കുന്ന ഈ മ്യൂസിക് വീഡിയോ നിർമ്മിച്ചിരിക്കുന്നത് ബാദുഷ ആണ്.
ചാൾസ് നസ്‌റീത് സംഗീതം നൽകിയിരിക്കുന്ന ഈ മനോഹരമായ ഗാനം ആലപിച്ചിരിക്കുന്നതും അദ്ദേഹമാണ്. ചാൾസിനൊപ്പം ചേർന്ന് ഈ ഗാനമാലപിച്ച ഗൗരി ലക്ഷ്മിയാണ് ഈ ഗാനത്തിന് വരികൾ എഴുതിയിരിക്കുന്നത്. രതീഷ് രാജ് എഡിറ്റ് ചെയ്തിരിക്കുന്ന ഈ വീഡിയോക്ക് വേണ്ടി മനോഹരമായ ദൃശ്യങ്ങൾ ഒരുക്കിയത് ജിബിൻ ജേക്കബ് എന്ന ക്യാമറാമാൻ ആണ്. മാതൃഭൂമിയുടെ കപ്പ ടിവിയുടെ യൂട്യൂബ് ചാനലിലാണ് ഈ മ്യൂസിക് വീഡിയോ റിലീസ് ചെയ്തിരിക്കുന്നത്. സ്വവർഗ പ്രണയം എന്നത് ഇപ്പോൾ നമ്മുടെ രാജ്യത്തു നിയമപരമാണ് എങ്കിലും പലരും സിനിമയിൽ പോലും ഇത് വിഷയമാക്കി കൊണ്ട് മുന്നോട്ടു വരാൻ മടിക്കുന്നുണ്ട്. പ്രത്യേകിച്ചും മലയാളത്തിൽ വളരെ അപൂർവമായി മാത്രമേ ഇത്തരം വിഷയങ്ങൾ പറഞ്ഞിട്ടുള്ളു. അങ്ങനെയിരിക്കുമ്പോൾ ഈ മ്യൂസിക് വീഡിയോ ആയി മുന്നോട്ട് വരാൻ അണിയറപ്രവർത്തകർ കാണിച്ച ധൈര്യം അഭിനന്ദനീയമാണ്.
