പ്രശസ്ത നടി അപർണ്ണ ബാലമുരളി നായികാ വേഷം ചെയ്ത ഇനി ഉത്തരം എന്ന ഫാമിലി ത്രില്ലറാണ് ഇപ്പോൾ സോഷ്യൽ മീഡിയയുടെ ചർച്ചാ വിഷയമായി മാറുന്നത്. നവാഗതനായ സുധീഷ് രാമചന്ദ്രൻ സംവിധാനം ചെയ്ത ഈ ചിത്രത്തിന് പ്രേക്ഷകരും നിരൂപകരും മികച്ച അഭിപ്രായങ്ങളാണ് നൽകുന്നത്. മലയാള സിനിമയിൽ ഇതുവരെ പുറത്തിറങ്ങിയ ഇൻവസ്റ്റിഗേഷൻ ത്രില്ലറുകളുടെ കൂട്ടത്തിൽ വളരെ വ്യത്യസ്തമായ ഒരു കഥ പറഞ്ഞു കൊണ്ടാണ് ഈ ചിത്രം ശ്രദ്ധ നേടുന്നത്. ഇനി ഉത്തരം തീയേറ്ററുകളിൽ തന്നെ കാണാൻ പ്രധാനമായും 5 കാരണങ്ങളാണുള്ളതെന്ന് ഈ ചിത്രം കണ്ടവർ പറയുന്നു. അതിൽ ഏറ്റവും ആദ്യത്തെ കാരണം, ഇതിന്റെ ഗംഭീര തിരക്കഥയാണ്. നവാഗതരായ രഞ്ജിത്- ഉണ്ണി ടീമാണ് പ്രേക്ഷകരെ ആകാംഷയുടെ മുൾമുനയിൽ നിർത്തുന്ന ഈ ത്രില്ലറിന്റെ തിരക്കഥ രചിച്ചത്. അടുത്ത കാരണം, അപർണ ബാലമുരളി, കലാഭവൻ ഷാജോൺ, ഹരീഷ് ഉത്തമൻ എന്നിവർ ഇതിൽ നടത്തിയ ഗംഭീര പ്രകടനമാണ്. ജാനകി, കാക്ക കരുണൻ, ഇളവരസ്സ് എന്നീ കഥാപാത്രങ്ങളായി ഇവർ ഈ ചിത്രത്തിൽ നിറഞ്ഞ് നിന്നു.
മൂന്നാമത്തെ കാരണം, മലയാള സിനിമയിൽ ഇന്ന് വരെ ഇത്രയും ത്രില്ലടിപ്പിക്കുന്ന, ഒരു സ്ത്രീപക്ഷ ഇൻവെസ്റ്റിഗേഷൻ ത്രില്ലർ ഉണ്ടായിട്ടില്ല എന്നതാണ്. ജീവിതത്തിൽ പ്രതിസന്ധികളിലൂടെ കടന്നുപോകുന്നവർക്ക് പ്രചോദനമായിരിക്കും ഇതിലെ ജാനകി എന്ന അപർണ ബാലമുരളിയുടെ കഥാപാത്രമെന്നത് ഈ ചിത്രം കാണാനുള്ള നാലാമത്തെ കാരണമായി മാറുന്നു. ഈ ചിത്രം തീയേറ്ററുകളിൽ തന്നെ കാണണം എന്ന പറയുന്നതിനുള്ള അഞ്ചാമത്തെ കാരണം, ഇത് നൽകിയ തീയേറ്റർ അനുഭവം തന്നെയാണ്. ആദ്യാവസാനം പ്രേക്ഷകനെ ത്രില്ലടിപ്പിക്കുന്ന ഈ ചിത്രം ഒരു ത്രില്ലറെന്ന നിലയിൽ പ്രേക്ഷകന് നൽകുന്ന അനുഭവം വളരെ വലുതാണ്. ചന്തുനാഥ്, സിദ്ധാർത്ഥ് മേനോൻ, സിദ്ദിഖ്, ജാഫർ ഇടുക്കി, ഷാജു ശ്രീധർ, ജയൻ ചേർത്തല, ബിനീഷ് പി, ഭാഗ്യരാജ് എന്നിവരും അഭിനയിച്ച ഈ ചിത്രം എ&വി എന്റർടൈൻമെന്റിന്റെ ബാനറിൽ വരുൺ, അരുൺ എന്നീ സഹോദരങ്ങളാണ് നിർമ്മിച്ചത്.
