ബോളിവുഡ് കിംഗ് ഖാൻ ഷാരൂഖ് ഖാൻ നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് തമിഴ് സംവിധായകൻ ആറ്റ്ലി സംവിധാനം ചെയ്യുന്ന ജവാൻ. അടുത്ത വർഷം ജൂൺ രണ്ടിന് റിലീസ് ചെയ്യുമെന്ന് പ്രഖ്യാപിച്ചിരിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ കുറച്ചു നാൾ മുൻപാണ് പുറത്തു വിട്ടത്. ഷാരൂഖ് ഖാൻ തന്നെയാണ് തന്റെ നിർമ്മാണ കമ്പനിയായ റെഡ് ചില്ലീസ് എന്റെർറ്റൈന്മെന്റിന്റെ ബാനറിൽ ജവാൻ നിർമ്മിക്കുന്നതെന്ന പ്രേത്യേകതയുമുണ്ട്. ലേഡി സൂപ്പർ സ്റ്റാർ നയൻതാര നായികാ വേഷം ചെയ്യുന്ന ഈ ചിത്രത്തിൽ പ്രിയാമണി, സാനിയ മൽഹോത്ര എന്നിവരും വേഷമിടുന്നുണ്ടെന്നു റിപ്പോർട്ടുകൾ വന്നിരുന്നു. ഇപ്പോൾ വരുന്ന സ്ഥിതീകരിക്കാത്ത വാർത്തകൾ പറയുന്നത് ബോളിവുഡ് സൂപ്പർ നായികാ താരമായ ദീപിക പദുക്കോൺ ഈ ചിത്രത്തിൽ ഒരതിഥി വേഷം ചെയ്യുന്നുണ്ട് എന്നാണ്. പിങ്ക് വില്ലയാണ് ദീപികയുമായി ജവാന്റെ അണിയറ പ്രവര്‍ത്തകര്‍ ചര്‍ച്ച നടത്തിയതായുള്ള റിപ്പോർട്ട് പുറത്തു വിട്ടത്.
നേരത്തെ ഇതിൽ ദളപതി വിജയ് അതിഥി വേഷം ചെയ്യുമെന്ന വാർത്തകളും പുറത്തു വന്നിരുന്നു. ഷാരൂഖ് ഖാൻ ഇരട്ട വേഷത്തിലാണ് ഈ ചിത്രത്തിലെത്തുകയെന്നാണ് സൂചന. ഒരു ഗാംഗ്സ്റ്ററായും, ആ ഗ്യാങ്സ്റ്ററിന്റെ അച്ഛനും സീനിയർ റോ ഓഫീസറായുമായ കഥാപാത്രവുമായാണ് ഷാരുഖ് ഖാൻ ഇതിലെത്തുന്നതെന്നാണ് പിങ്ക് വില്ല നേരത്തെ റിപ്പോർട്ട് ചെയ്തത്. ഹിന്ദി, മലയാളം, തമിഴ്, തെലുങ്ക്, കന്നഡ ഭാഷകളിൽ ഒരേ സമയം റിലീസ് ചെയ്യാൻ പോകുന്ന ഈ ചിത്രത്തിന് സംഗീതമൊരുക്കുന്നത് തമിഴ് സംഗീത സംവിധായകനായ അനിരുദ്ധ് രവിചന്ദറാണ്. അനിരുദ്ധിന്റെ ബോളിവുഡ് അരങ്ങേറ്റമാണ് ജവാനിലൂടെ നടക്കുക. ഒരു ഇൻവെസ്റ്റിഗേഷൻ ഓഫീസറായാണ് നയൻതാര ഇതിലഭിനയിക്കുന്നതെന്നാണ് വിവരം.
