മലയാളത്തിന്റെ യുവതാരം ടോവിനോ തോമസ് നായകനായി എത്തുന്ന അദൃശ്യജാലകങ്ങൾ എന്ന ചിത്രത്തിന്റെ ട്രയ്ലർ പ്രേക്ഷക ശ്രദ്ധ നേടുന്നു. ഡോക്ടർ ബിജു സംവിധാനം ചെയ്ത ഈ ചിത്രം എസ്റ്റോണിയയിൽ നടക്കുന്ന 27 ആം ടാലിൻ ബ്ലാക്ക്‌ നൈറ്റ്‌സ് ഇന്റർനാഷണൽ ഫിലിം ഫെസ്റ്റിവലിന്റെ മത്സര വിഭാഗത്തിലേക്ക് തിരഞ്ഞെടുക്കപ്പെട്ടു. ഈ വിഭാഗത്തിൽ ഈ ഫിലിം ഫെസ്റ്റിവലിൽ തിരഞ്ഞെടുക്കപ്പെട്ട ആദ്യ മലയാള ചിത്രമാണ് അദൃശ്യജാലകങ്ങൾ. ടോവിനോ തോമസിന്റെ ഞെട്ടിക്കുന്ന മേക്കോവർ ആണ് ഈ ചിത്രത്തിന്റെ ഒരു ഹൈലൈറ്റ്. അമ്പരപ്പിക്കുന്ന പ്രകടനമാണ് ഈ യുവനടൻ കാഴ്ച്ചവെച്ചിരിക്കുന്നതെന്ന സൂചനയാണ് ഇതിന്റെ ട്രയ്ലർ നമ്മുക്ക് നൽകുന്നത്. നിമിഷ സജയൻ നായികാ വേഷം ചെയ്യുന്ന ഈ ചിത്രത്തിൽ ഇന്ദ്രൻസും ഒരു നിർണ്ണായക വേഷം ചെയ്യുന്നുണ്ട്.
മൈത്രി മൂവി മേക്കേഴ്‌സ്, ടോവിനോ തോമസ് പ്രൊഡക്ഷൻസ്, എല്ലനാർ ഫിലിം കമ്പനി എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ഈ ചിത്രത്തിലെ ടോവിനോ തോമസിന്റെ ലുക്ക് ഇപ്പോൾ തന്നെ സോഷ്യൽ മീഡിയയിൽ വൈറലാണ്. ഈ നടന്റെ കരിയർ ബെസ്റ്റ് പ്രകടനമാണ് ഇതിൽ കാണാൻ സാധിക്കുക എന്നാണ് ആരാധകർ പ്രതീക്ഷിക്കുന്നത്. ഒരു കുപ്രസിദ്ധ പയ്യൻ എന്ന ചിത്രത്തിന് ശേഷം ടോവിനോ തോമസ്- നിമിഷ സജയൻ ടീം ഒന്നിച്ചഭിനയിച്ച ചിത്രം കൂടിയാണിത്. ഒട്ടേറെ ദേശീയ- സംസ്ഥാന പുരസ്‌കാരങ്ങൾ നേടിയെടുത്തിട്ടുള്ള ചിത്രങ്ങൾ ഒരുക്കിയ ഡോക്ടർ ബിജുവിനൊപ്പം ടോവിനോ തോമസ് ഒന്നിക്കുന്ന ചിത്രമെന്ന നിലയിൽ പ്രഖ്യാപന സമയം മുതൽ തന്നെ ഈ ചിത്രം വാർത്തകളിൽ നിറഞ്ഞിരുന്നു. അദൃശ്യജാലകങ്ങൾ തീയേറ്റർ റിലീസ് ചെയ്യുന്ന തീയതി ഇതുവരെ പുറത്ത് വിട്ടിട്ടില്ല.
