തമിഴിലെ യുവ സൂപ്പർ താരങ്ങളിൽ ഒരാളായ ശിവകാർത്തികേയൻ നായകനായെത്തുന്ന ഏറ്റവും പുതിയ ചിത്രമാണ് പ്രിൻസ്. ദീപാവലി റിലീസായി ഒക്ടോബർ ഇരുപത്തിയൊന്നിനാണ് ഈ ചിത്രം പ്രേക്ഷകരുടെ മുന്നിലെത്തുക. അതിന് മുന്നോടിയായി ഈ ചിത്രത്തിന്റെ ട്രൈലെർ ഇന്നലെ റിലീസ് ചെയ്തു. മികച്ച പ്രേക്ഷക പ്രതികരണമാണ് രസകരമായ ഈ ട്രെയിലറിന് ലഭിച്ചു കൊണ്ടിരിക്കുന്നത്. ഒരു ഇന്ത്യൻ യുവാവ് ബ്രിട്ടീഷ് യുവതിയെ പ്രണയിക്കുന്നതും തുടർന്ന് നടക്കുന്ന സംഭവ വികാസങ്ങളുമാണ് ഈ ചിത്രത്തിൽ നമ്മൾ കാണാൻ പോകുന്നതെന്ന ഫീലാണ് ഈ ട്രൈലെർ നമ്മുക്ക് തരുന്നത്. ഒരു റൊമാന്റിക് കോമഡി ചിത്രമായി ഒരുക്കിയിരിക്കുന്ന ഈ ചിത്രം തമിഴിലും തെലുങ്കിലും ഒരേ സമയം റിലീസ് ചെയ്യുന്ന ആദ്യ ശിവകാർത്തികേയൻ ചിത്രം കൂടിയാണ്. അനുദീപ് സംവിധാനം ചെയ്തിരിക്കുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് ഉക്രേനിയൻ സ്വദേശിയായ മരിയയാണ്.
സത്യരാജ്, പ്രേംഗി അമരെൻ, പ്രാങ്ക്സ്റ്റെര്‍ രാഹുല്‍ എന്നിവരും വേഷമിട്ടിരിക്കുന്ന ഈ ചിത്രം, ശ്രീ വെങ്കടേശ്വരൻ സിനിമാസ് എല്‍എല്‍പി, സുരേഷ് പ്രൊഡക്ഷൻസ് എന്നിവർ ചേർന്നാണ് നിർമ്മിച്ചിരിക്കുന്നത്. സംവിധായകൻ അനുദീപ് തന്നെ രചിച്ച ഈ ചിത്രം ഇതിനോടകം 100 കോടിയുടെ പ്രീ-റിലീസ് ബിസിനസ്സാണ് നടത്തിയിരിക്കുന്നത്. മനോജ് പരമഹംസ ക്യാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്യുന്നത് പ്രവീൺ കെ എൽ ആണ്. തമൻ എസ് ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത്‌. ഈ ചിത്രത്തിന്റെ ഡിജിറ്റൽ, സാറ്റലൈറ്റ് അവകാശങ്ങൾ 40 കോടിക്കാണ് വിറ്റുപോയത്. അതുപോലെ 45 കോടി രൂപയാണ് ഇതിന്റെ തമിഴ് പതിപ്പിന്റെ തിയേറ്റർ അവകാശമായി ലഭിച്ചത്.
