പ്രശസ്ത മലയാള നടനും സംവിധായകനുമായ സിദ്ധാർഥ് ഭരതന്റെ ഏറ്റവും പുതിയ ചിത്രമായ ചതുരം ഈ കഴിഞ്ഞ വെള്ളിയാഴ്ചയാണ് പ്രേക്ഷകരുടെ മുന്നിലെത്തിയത്. മികച്ച പ്രേക്ഷക പ്രതികരണവും നിരൂപക പ്രശംസയും നേടുന്ന ഈ ചിത്രത്തെ മാറുന്ന മലയാള സിനിമയുടെ പുതിയ മുഖമെന്നാണ് പ്രേക്ഷകർ വിശേഷിപ്പിക്കുന്നത്. ഓരോ ഇറോട്ടിക് ത്രില്ലർ എന്നോ ഡ്രാമയെന്നോയൊക്കെ നമ്മുക്ക് വിശേഷിപ്പിക്കാൻ സാധിക്കുന്ന ഈ ചിത്രം 2019–ലെ സാഹിത്യ അക്കാദമി അവാർഡ് ജേതാവ് വിനോയ് തോമസും സിദ്ധാർത്ഥ് ഭരതനും ചേർന്നാണ് രചിച്ചത്. റോഷൻ മാത്യു, സ്വാസിക, അലൻസിയർ, ശാന്തി ബാലചന്ദ്രൻ എന്നിവർ പ്രധാന വേഷങ്ങൾ ചെയ്യുന്ന ഈ ചിത്രത്തിലെ ഇവരുടെ പ്രകടനവും വമ്പൻ കയ്യടിയാണ് നേടുന്നത്. അച്ചായനായി അലെൻസിയർ, സെൽന ആയി സ്വാസിക. ബെൽത്താസറായി റോഷൻ മാത്യു എന്നിവർ കാഴ്ച വെച്ചിരിക്കുന്നത് അഭിനന്ദിക്കേണ്ട പ്രകടനം തന്നെയാണ്. ഗ്രീൻവിച്ച് എന്റർടെയ്ൻമെന്റ്‌സും യെല്ലോ ബേർഡ് പ്രൊഡക്‌ഷനും ചേർന്നാണ് ചതുരത്തിന്റെ നിർമ്മാണം നിർവഹിച്ചിരിക്കുന്നത്.
https://www.instagram.com/p/CknBYiIvioU/
പതിനെട്ട് വയസ്സിന് മുകളിലുള്ള ആര്‍ക്കും അലോസരമായി തോന്നാത്ത വിധത്തിലാണ് ഈ ചിത്രത്തിൽ ലൈംഗികത ഉൾപ്പെടുത്തിയിരിക്കുന്നതെന്നതും ശ്രദ്ധേയമാണ്. നിദ്ര, ചന്ദ്രേട്ടന്‍ എവിടെയാ, വര്‍ണ്ണ്യത്തില്‍ ആശങ്ക എന്നീ ചിത്രങ്ങള്‍ക്കു ശേഷം സിദ്ധാര്‍ഥ് ഭരതന്‍ സംവിധാനം ചെയ്ത ഈ ചിത്രത്തിൽ ഒരു ഭരതൻ ടച് ഉണ്ടെന്നു പറയുന്നവരും ഏറെയാണ്. ഏതായാലും വളരെ വ്യത്യസ്തമായ ഒരു ചലച്ചിത്രാനുഭവമാണ് ചതുരം പ്രേക്ഷകർക്ക് സമ്മാനിക്കുന്നത്. പ്രദീഷ് വർമ്മ ക്യാമറ ചലിപ്പിച്ച ഈ ചിത്രം എഡിറ്റ് ചെയ്തത് ദീപു ജോസഫും, ഇതിനു സംഗീതമൊരുക്കിയത് പ്രശാന്ത് പിള്ളയുമാണ്. ഇപ്പോഴിതിന്റെ പുതിയ ടീസറും പ്രേക്ഷകരുടെ മുന്നിലെത്തിയിട്ടുണ്ട്. നിഷാന്ത് സാഗര്‍, ലിയോണ ലിഷോയ്, ജാഫര്‍ ഇടുക്കി, ജിലു ജോസഫ് എന്നിവരും ഇതിൽ അഭിനയിച്ചിട്ടുണ്ട്.
