മലയാള സിനിമാ പ്രേമികളുടെ എക്കാലത്തേയും പ്രീയപ്പെട്ട നടിമാരിൽ ഒരാളാണ് സംയുക്ത വർമ്മ. ഒരുപിടി മികച്ച കഥാപാത്രങ്ങളെ നമ്മുക്ക് സമ്മാനിച്ച ഈ നടി സൗന്ദര്യം കൊണ്ടും അഭിനയത്തികവ് കൊണ്ടും പ്രേക്ഷകരുടെ മനസ്സിലിടം നേടിയ കലാകാരിയാണ്. മലയാള സിനിമയിലെ ഏറ്റവും മികച്ച നടിമാരുടെ ലിസ്റ്റിൽ ഒരു സ്ഥാനം എന്നുമർഹിക്കുന്ന ഈ നടി കാമ്പുള്ള വേഷങ്ങളും അതുപോലെ വളരെ രസകരമായ കഥാപാത്രങ്ങളും അവതരിപ്പിച്ചിട്ടുണ്ട്. നടൻ ബിജു മേനോനുമായുള്ള പ്രണയ വിവാഹത്തിന് ശേഷം സിനിമയിൽ നിന്ന് മാറി നിന്ന സംയുക്ത അതിനു ശേഷം ഈ അടുത്തകാലത്താണ് പരസ്യ ചിത്രത്തിൽ ബിജു മേനോനൊപ്പം അഭിനയിച്ചു കൊണ്ട് തിരിച്ചു വന്നത്. ഇപ്പോഴും തന്റെ ആരോഗ്യവും സൗന്ദര്യവും കാത്തു സൂക്ഷിക്കുന്നതിൽ ഏറെ ശ്രദ്ധാലുവായ സംയുക്ത വർമയുടെ ആരോഗ്യ രഹസ്യം ചിട്ടയായ വ്യായാമവും യോഗ പരിശീലനവുമാണ്. ഇപ്പോൾ സോഷ്യൽ മീഡിയയിൽ ഏറെ ശ്രദ്ധ നേടുന്നതും സംയുക്തയുടെ ഒരു യോഗാസന മുറയുടെ വീഡിയോയാണ്.
അഷ്ടാംഗ വിന്യാസ പ്രാഥമിക ശ്രേണി ഉർധവ ധനുരാസനത്തിലേക്ക് മടങ്ങുക എന്നാണ് തന്റെ യോഗാസന വീഡിയോ സോഷ്യൽ മീഡിയയിൽ പങ്കു വെച്ച് കൊണ്ട് സംയുകത കുറിച്ചിരിക്കുന്നത്. യോഗാസനത്തിലെ തന്നെ കഠിനമായ മുറകളിലൊന്നായ ഉർധവ ധനുരാസനം ആണ് സംയുകത വീഡിയോയിൽ ചെയ്യുന്നത്. 15 വർഷത്തോളമായി യോഗ അഭ്യസിക്കുന്ന സംയുക്ത മൈസൂരിൽ നിന്നാണ് യോഗയിൽ പരിശീലനം നേടിയത്. യോഗ ചെയ്യുന്നതിൻ്റെ ചിത്രങ്ങളും വീഡിയോയുമെല്ലാം സംയുക്ത സ്ഥിരമായി സോഷ്യൽ മീഡിയയിൽ പങ്കു വെക്കാറുണ്ട്. സത്യൻ അന്തിക്കാട് സംവിധാനം ചെയ്ത വീണ്ടും ചില വീട്ടു കാര്യങ്ങൾ എന്ന ചിത്രത്തിലൂടെ മലയാള സിനിമയിൽ അരങ്ങേറ്റം കുറിച്ച സംയുക്ത അവസാനമായി അഭിനയിച്ച ചിത്രം പതിനെട്ടു വർഷം മുൻപ് റിലീസ് ചെയ്ത തെങ്കാശി പട്ടണത്തിന്റെ അതേ പേരിലുള്ള തമിഴ് റീമേക് ആണ്.
