മലയാളത്തിന്റെ മഹാനടൻ മോഹൻലാൽ നായകനായ ആറാട്ട് എന്ന ചിത്രം ഇപ്പോൾ കേരളത്തിലെ തീയേറ്ററുകളിൽ ഗംഭീര വിജയം നേടി മുന്നേറുകയാണ്. ഉദയ കൃഷ്ണ രചിച്ച മാസ്സ് മസാല കോമഡി ആക്ഷൻ എന്റെർറ്റൈനെർ ചിത്രം സംവിധാനം ചെയ്തിരിക്കുന്നത് ബി ഉണ്ണികൃഷ്ണൻ ആണ്. ഇപ്പോഴിതാ ഈ ചിത്രത്തിലെ ആദ്യ വീഡിയോ ഗാനം റിലീസ് ചെയ്തിരിക്കുകയാണ് അണിയറ പ്രവർത്തകർ. ഒന്നാം കണ്ടം എന്ന് തുടങ്ങുന്ന ഈ ഗാനം അതിമനോഹരമായാണ് ചിത്രീകരിച്ചിരിക്കുന്നത്. രാഹുൽ രാജ് സംഗീതം പകർന്ന ഈ ഗാനം ശ്വേതാ അശോക്, നാരായണി ഗോപൻ, യാസീൻ നിസാർ, മിഥുൻ ജയരാജ്, അശ്വിൻ വിജയൻ, രാജ്‌കുമാർ രാധാകൃഷ്ണൻ എന്നവരാണ് ആലപിച്ചിരിക്കുന്നത്. കിടിലൻ ലുക്കിലാണ് മോഹൻലാൽ ഈ ഗാനരംഗത്തിൽ പ്രത്യക്ഷപെട്ടിരിക്കുന്നത്. ഇതിലെ ഒരു ഭാഗത്തു അദ്ദേഹം ഏതാനും നൃത്ത ചുവടുകൾ വെക്കുന്നതും വളരെ രസകരമായി തന്നെ ചിത്രീകരിച്ചിട്ടുണ്ട്.
ഒരു ഗ്രാമത്തിൽ നടക്കുന്ന ആഘോഷ ഗാനം പോലെയാണ് ഇത് ഒരുക്കിയിരിക്കുന്നത്. മോഹൻലാലിന് ഒപ്പം ഒരു വലിയ താരനിര തന്നെ ഈ ഗാനത്തിൽ ആടിപാടുന്നുണ്ട്. രചന നാരായണൻകുട്ടി, സ്വാസിക, മാളവിക, നന്ദു, അശ്വിൻ കുമാർ, ലുഖ്മാൻ, ജോണി ആന്റണി, കൊച്ചുബു പ്രേമൻ തുടങ്ങി ഒട്ടേറെ പേരെ ഈ ഗാനരംഗത്ത്‌ നമ്മുക്ക് കാണാൻ സാധിക്കും. ഈ ഗാനം രചിച്ചത് രാജീവ് ഗോവിന്ദൻ ആണ്. ബി ഉണ്ണികൃഷ്ണനും എം പി എം ഗ്രൂപ്പിന്റെ ശക്തിയും ചേർന്ന് നിർമ്മിച്ചിരിക്കുന്ന ഈ ചിത്രത്തിന്റെ പശ്ചാത്തല സംഗീതമൊരുക്കിയതും രാഹുൽ രാജ് തന്നെയാണ്. മലയാള സിനിമയിൽ നിന്നുള്ള ഏറ്റവും വലിയ ആഗോള റിലീസ് ആയാണ് ആറാട്ട് കഴിഞ്ഞ ദിവസം പ്രദർശനം ആരംഭിച്ചത്.
