സുരാജ് വെഞ്ഞാറമൂട് നായകനായി എത്തുന്ന പുതിയ ചിത്രമാണ് റോയ്. ഷെെന്‍ ടോം ചാക്കോ, സിജാ റോസ് എന്നിവരും പ്രധാന കഥാപാത്രങ്ങളായി എത്തുന്ന ഈ ചിത്രത്തിലെ വീഡിയോ സോങ് പുറത്തു വന്നിരിക്കുകയാണ് ഇപ്പോൾ. കൺ വാതിൽ ചാരാതെ എന്ന വരികളോടെ തുടങ്ങുന്ന പുതിയ ഗാനത്തിന് മികച്ച സ്വീകരണമാണ് സോഷ്യൽ മീഡിയയിൽ നിന്നും ലഭിക്കുന്നത്. സുനില്‍ ഇബ്രാഹിം കഥയും തിരക്കഥയും സംഭാഷണവുമെഴുതി സംവിധാനം ചെയ്ത ഈ ചിത്രത്തിലെ ആദ്യ ഗാനവും വലിയ രീതിയിൽ തന്നെ പ്രേക്ഷകരെ ആകർഷിച്ചിരുന്നു. വിനായക് ശശികുമാർ രചിച്ചു, മുന്ന പി.എം. സംഗീതം പകർന്ന്, സിത്താര കൃഷ്ണകുമാർ, സൂരജ് സന്തോഷ് എന്നിവർ ആലപിച്ച ‘അരികിൽ അരികിൽ ആരോ അറിയാതെ… എന്ന ഗാനമാണ് ആദ്യം റിലീസ് ചെയ്തത്. നെട്ടൂരാന്‍ ഫിലിംസ്, വിശ്വദീപ്തി ഫിലിംസ് എന്നിവയുടെ ബാനറില്‍ സജീഷ് മഞ്ചേരി, സനൂബ് കെ. യൂസഫ് എന്നിവര്‍ ചേര്‍ന്നു നിർമ്മിച്ച ഈ ചിത്രം ഒരു ഫാമിലി ത്രില്ലർ ആണെന്ന് റിപ്പോർട്ടുകൾ പറയുന്നു.
നേഹ നായർ, രഖിൽ ഷൌക്കത്ത് അലി രാജേഷ് എന്നിവർ ചേർന്നാണ് ഇപ്പോൾ വന്നിരിക്കുന്ന കൺ വാതിൽ ചാരാതെ എന്ന പുതിയ ഗാനം ആലപിച്ചിരിക്കുന്നത്. സുരാജ് വെഞ്ഞാറമ്മൂട്, സിജാ റോസ് എന്നിവരാണ് ഈ ഗാനത്തിൽ അഭിനയിച്ചിരിക്കുന്നത്. സൂപ്പർ ഹിറ്റായ മലയാള ചിത്രം വിജയ് സൂപ്പറും പൗര്ണമിയും നിർമ്മിച്ച സൂര്യ ഫിലിംസ് ആണ് ഈ ചിത്രം പ്രദർശനത്തിന് എത്തിക്കുന്നത്. റോണി ഡേവിഡ്, ജിന്‍സ് ഭാസ്ക്കര്‍, വി. കെ. ശ്രീരാമൻ, വിജീഷ് വിജയന്‍, റിയ സെെറ, ഗ്രേസി ജോൺ, ബോബന്‍ സാമുവല്‍, അഞ്ജു ജോസഫ്, ആനന്ദ് മന്മഥൻ, ജെനി പള്ളത്ത്, രാജഗോപാലന്‍, യാഹിയ ഖാദര്‍, ദില്‍ജിത്ത്, അനൂപ് കുമാർ, അനുപ്രഭ, രേഷ്മ ഷേണായി തുടങ്ങിയവരും അഭിനയിക്കുന്ന ഈ ചിത്രം എഡിറ്റ് ചെയ്തിരിക്കുന്നത് വി സാജൻ ആണ്. ഗോപി സുന്ദർ പശ്ചാത്തല സംഗീതമൊരുക്കിയ ഈ ചിത്രത്തിന് വേണ്ടി കാമറ ചലിപ്പിച്ചിരിക്കുന്നതു ജയേഷ് മോഹന്‍ ആണ്.
