ദളപതി വിജയ് നായകനായി എത്തുന്ന ബീസ്റ്റ് ഏപ്രിൽ പതിമൂന്നിന് ആഗോള റിലീസ് ആയി എത്തുകയാണ്. നെൽസൺ ദിലീപ്കുമാർ രചിച്ചു സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് സൺ പിക്ചേഴ്സ് ആണ്. വിജയ്‌യുടെ കരിയറിലെ ഏറ്റവും വലിയ റിലീസ് ആയാണ് ബീസ്റ്റ് എത്തുന്നത്. ഇപ്പോഴിതാ റിലീസിനോട് അനുബന്ധിച്ചു ഓരോ ദിവസവും ഈ ചിത്രത്തിന്റെ ഓരോ പ്രോമോ വീഡിയോ വെച്ച് സൺ ടിവിയുടെ യൂട്യൂബ് ചാനൽ വഴി റിലീസ് ചെയ്തുകൊണ്ടിരിക്കുകയാണ് നിർമ്മാതാക്കൾ. അതിലെ ഏറ്റവും പുതിയ പ്രമോ വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലായി മാറുന്നത്. ദളപതി വിജയ്‌യുടെ ഒരു കിടിലൻ സംഘട്ടന രംഗമാണ് ഈ പ്രമോ വീഡിയോയുടെ ഹൈലൈറ്റ് എന്ന് പറയാം.
ഇതുകൂടി കണ്ടതോടെ ദളപതി വിജയ് ആരാധകർ ഏറെ ആവേശത്തിലാണ്. ഈ ചിത്രത്തിലെ മൂന്നു ഗാനങ്ങളുടെ ലിറിക് വീഡിയോ പുറത്തു വരികയും സൂപ്പർ ഹിറ്റാവുകയും ചെയ്തിരുന്നു. അറബിക് കുത്ത്, ജോളിയാ ജിംഖാന, ബീസ്റ്റ് മോഡ് എന്ന തീം സോങ് എന്നിവയാണ് പുറത്തു വന്നത്. ഇതിൽ അറബിക് കുത്ത് എന്ന ഗാനം ലോകം മുഴുവനും ട്രെൻഡിങ് ആയി മാറിയിരുന്നു. അനിരുദ്ധ് രവിചന്ദർ സംഗീതമൊരുക്കിയ ഈ ചിത്രത്തിലെ ഗാനങ്ങൾ ആലപിച്ചിരിക്കുന്നതും അദ്ദേഹമാണ്. പൂജ ഹെഗ്‌ഡെയാണ് ബീസ്റ്റിലെ നായികാ വേഷം ചെയ്തിരിക്കുന്നത്. മലയാളി താരങ്ങളായ ഷൈൻ ടോം ചാക്കോ, അപർണ ദാസ് എന്നിവരും അഭിനയിച്ച ഈ ചിത്രത്തിൽ സെൽവ രാഘവൻ, പുകഴ്, യോഗി ബാബു, അങ്കുർ വികൽ തുടങ്ങി ഒട്ടേറെ താരങ്ങൾ ഉണ്ട്. ആർ നിർമ്മൽ എഡിറ്റിംഗ് നിർവഹിച്ച ബീസ്റ്റിനു വേണ്ടി കാമറ ചലിപ്പിച്ചത് മനോജ് പരമഹംസയാണ്.
