ടോവിനോ തോമസ് നായകനായി അഭിനയിച്ച ഗപ്പി എന്ന ചിത്രത്തിലൂടെ പ്രേക്ഷകരുടെ പ്രശംസ പിടിച്ചു പറ്റിയ ജോൺ പോൾ ജോർജ് സംവിധാനം ചെയ്ത രണ്ടാമത്തെ ചിത്രമായ അമ്പിളി ഇപ്പോൾ ഗംഭീര പ്രേക്ഷക പ്രശംസ നേടി മുന്നേറുകയാണ്. സൗബിൻ ഷാഹിറിനെ പ്രധാന കഥാപാത്രമാക്കി ഒരുക്കിയിരിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നതും ജോൺ പോൾ ജോർജ് തന്നെയാണ്. ടൈറ്റിൽ കഥാപാത്രമായ അമ്പിളി ആയുള്ള സൗബിന്റെ ഗംഭീര പ്രകടനം തന്നെയാണ് ഈ ചിത്രത്തിന്റെ ഏറ്റവും വലിയ ഹൈലൈറ്റ്. അതുപോലെ തന്നെ ഈ ചിത്രത്തിന്റെ വിജയത്തിൽ നിർണ്ണായകമായ ഒന്നാണ് വിഷ്ണു വിജയ് ഈണം നൽകിയ ഇതിലെ ഗാനങ്ങൾ. അമ്പിളിയിലെ എല്ലാ ഗാനങ്ങളും ഇതിനോടകം സൂപ്പർ ഹിറ്റായി കഴിഞ്ഞു. ഇപ്പോഴിതാ ഈ ചിത്രത്തിന് വേണ്ടി ശങ്കർ മഹാദേവൻ ആലപിച്ച മനോഹര ഗാനത്തിന്റെ വീഡിയോ അണിയറ പ്രവർത്തകർ പുറത്തു വിട്ടു കഴിഞ്ഞു.
നെഞ്ചകമേ എന്ന് തുടങ്ങുന്ന ഈ ഗാനം രചിച്ചത് വിനായക് ശശികുമാർ ആണ്. മനോഹരമായ ഈ മെലഡിക്ക് വേണ്ടി അതിലും മനോഹരമായ ദൃശ്യങ്ങൾ ആണ് ഒരുക്കിയിരിക്കുന്നത്. ശരൺ വേലായുധൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തിരിക്കുന്നത് കിരൺ ദാസ് ആണ്. ഇ ഫോർ എന്റെർറ്റൈന്മെന്റിന്റെ ബാനറിൽ സി വി സാരഥി, മുകേഷ് ആർ മെഹ്ത എന്നിവരും എ വി എ പ്രൊഡക്ഷൻസിന്റെ ബാനറിൽ എ വി അനൂപും ചേർന്ന് നിർമ്മിച്ച അമ്പിളിയിലെ നായികാ വേഷം ചെയ്തിരിക്കുന്നത് തൻവി റാം ആണ്. ഇവരോടൊപ്പം പ്രശസ്ത നടി നസ്രിയയുടെ സഹോദരനായ നവീൻ നസീമും ഒരു പ്രധാന വേഷം അമ്പിളിയിൽ അവതരിപ്പിച്ചിട്ടുണ്ട്..
