മലയാളത്തിന്റെ മഹാനടൻ മോഹൻലാലാണ് ഇന്നലെ മുതൽ സോഷ്യൽ മീഡിയയിൽ നിറഞ്ഞു നിൽക്കുന്ന താരം. അമ്മ സംഘടനക്കു വേണ്ടി മഴവിൽ മനോരമ സംഘടിപ്പിക്കുന്ന വമ്പൻ ഷോയുടെ റിഹേഴ്സൽ ക്യാംപിൽ നിന്നുള്ള ഒരു ഡാൻസ് വീഡിയോ ആണ് മലയാള സിനിമ പ്രേമികളും ആരാധകരും ഒരേപോലെ ഏറ്റെടുക്കുന്നത്. ഇപ്പോൾ സോഷ്യൽ മീഡിയ റീൽസുകളിൽ ട്രെൻഡായി നിൽക്കുന്ന ഒരു പുതിയ ഗാനത്തിന് മോഹൻലാൽ ചുവടു വെക്കുന്ന വീഡിയോയാണിത്. അതിമനോഹരമായാണ് ഈ ഗാനത്തിന് മോഹൻലാൽ ചുവടു വെക്കുന്നത്. ഈ പ്രായത്തിലും എത്ര രസകരമായാണ് അദ്ദേഹം നൃത്തം ചെയ്യുന്നതെന്നും, നൃത്ത ചുവടുകളിൽ അദ്ദേഹം പുലർത്തുന്ന വഴക്കവും ഊർജവും വളരെ വലുതാണെന്നും വീഡിയോ പങ്കു വെച്ച് കൊണ്ട് ഓരോ പ്രേക്ഷകനും പറയുന്നുണ്ട്. മോഹൻലാലിനൊപ്പം അമ്മ സംഘടനയിലെ ഒരു പിടി സഹതാരങ്ങളും ഈ ഗാനത്തിന് ചുവടു വെക്കുന്നുണ്ട്.
മഞ്ജു പിള്ളൈ, സ്വാസിക, ബാബുരാജ്, സ്വേതാ മേനോൻ, കൈലാഷ്, ലെന, സുരഭി ലക്ഷ്മി, ദിനേശ് പ്രഭാകർ, സുധീർ കരമന, പൊന്നമ്മ ബാബു, തെസ്നി ഖാൻ, മുന്ന, പാരിസ് ലക്ഷ്മി, രചന നാരായണൻ കുട്ടി, റംസാൻ, ദേവി ചന്ദന തുടങ്ങിയവരെയൊക്കെ ഈ വീഡിയോയിൽ കാണാം. അമ്മ സംഘടനയിലെ അംഗങ്ങളുടെ പെൻഷൻ തുക അയ്യായിരത്തിൽ നിന്ന് പതിനായിരത്തിലേക്കു ഉയർത്താനായുള്ള ഫണ്ട് ശേഖരണത്തിന്റെ ഭാഗമായാണ് ഈ ഷോ നടത്തുന്നത്. ഇപ്പോൾ കൊച്ചിയിലാണ് ഇതിന്റെ റിഹേഴ്സൽ ക്യാമ്പ് നടക്കുന്നത്. തന്റെ ആദ്യ സംവിധാന സംരംഭമായ ബറോസ്സിന്റെ ചിത്രീകരണം കഴിഞ്ഞ ദിവസം ചെന്നൈയിൽ പൂർത്തിയാക്കിയതിനു ശേഷമാണു മോഹൻലാൽ ഈ ക്യാമ്പിൽ ജോയിൻ ചെയ്തത്. കഴിഞ്ഞ ദിവസം മെഗാ സ്റ്റാർ മമ്മൂട്ടിയും ക്യാമ്പിൽ എത്തിയിരുന്നു.
