“There is a hero in every villain.. There is a villain in every hero..” മോഹന്‍ലാലിന്‍റെ ശബ്ദത്തില്‍ ഈ തകര്‍പ്പന് ഡയലോഗുമായാണ് വില്ലന്‍റെ ഓഡിയോ സോങ് പ്രൊമോ ഇന്ന് റിലീസ് ചെയ്തത്. നടന്‍ മോഹന്‍ലാല്‍ തന്‍റെ ഫേസ്ബുക്ക് പേജിലൂടെ റിലീസ് ചെയ്ത ഈ പ്രൊമോ വീഡിയോയ്ക്ക് വമ്പന്‍ സ്വീകരണമാണ് സോഷ്യല്‍ മീഡിയ നല്‍കിയത്. വില്ലന്‍റെ സ്റ്റൈലിഷ് തീം മ്യൂസിക്കും ചിത്രത്തിലെ ഗാനങ്ങളുടെ പ്രൊമോയുമാണ് ഇതില്‍ ഉള്‍പ്പെടുത്തിയിട്ടുള്ളത്.
മോഹന്‍ലാലിന്‍റെ തന്നെ ചിത്രമായിരുന്ന ഒപ്പത്തിന് വേണ്ടി മ്യൂസിക്ക് ഒരുക്കിയിരുന്ന 4 മ്യൂസിക്കാണ് വില്ലന് വേണ്ടി ഗാനങ്ങള്‍ ഒരുക്കിയിരിക്കുന്നത്. തെലുഗു സിനിമ താരം റാഷി ഖന്ന മലയാളത്തില്‍ ഗായികയായി അരങ്ങേറ്റം കുറിക്കുന്നുമുണ്ട് ഈ ചിത്രത്തിലൂടെ. കണ്ടിട്ടും കണ്ടിട്ടും എന്ന ഗാനത്തിന് ശബ്ദം നല്‍കിയിരിക്കുന്നത് ഗാനഗന്ധർവ്വൻ യേശുദാസ് ആണ്.
മാടമ്പി, ഗ്രാന്‍റ്മാസ്റ്റര്‍, മിസ്റ്റര്‍ ഫ്രോഡ് എന്നീ ചിത്രങ്ങള്‍ക്ക് ശേഷം മോഹന്‍ലാല്‍-ബി ഉണ്ണികൃഷ്ണന്‍ ടീം ഒന്നിക്കുന്ന ചിത്രമാണ് വില്ലന്. ഇതില്‍ മാടമ്പിയും ഗ്രാന്‍റ്മാസ്റ്ററും ബോക്സ്ഓഫീസില്‍ വമ്പന്‍ ഹിറ്റുകളുമായിരുന്നു. മോഹന്‍ലാലിനെ കൂടാതെ മഞ്ജു വാര്യര്‍, തമിഴ് താരം വിശാല്‍, ഹന്‍സിക മോട്വാണി, തെലുങ്ക് താരം ശ്രീകാന്ത് തുടങ്ങിയവരും പ്രധാന വേഷത്തില്‍ എത്തുന്നു.
