തെലുങ്കിലെ സൂപ്പർ സ്റ്റാർ മഹേഷ് ബാബു നായകനായി എത്തുന്ന ഏറ്റവും പുതിയ ചിത്രമാണ് സർക്കാരു വാരി പാട്ട. കീർത്തി സുരേഷ് നായികാ വേഷം ചെയ്യുന്ന ഈ ചിത്രത്തിലെ കലാവതി എന്ന് തുടങ്ങുന്ന ഗാനത്തിന്റെ ലിറിക്കൽ വീഡിയോ ഇന്നലെയാണ് റിലീസ് ചെയ്തത്. ഒഫീഷ്യൽ ആയി റിലീസ് ചെയ്യുന്നതിന് മുൻപ് തന്നെ ഈ വീഡിയോ ചോരുകയും ചെയ്തിരുന്നു. എന്നിട്ടും ഇപ്പോഴിതാ, തെന്നിന്ത്യയിലെ തന്നെ പുതിയ ഒരു റെക്കോർഡ് യൂട്യൂബിൽ സൃഷ്ടിച്ചിരിക്കുകയാണ് ഈ ഗാനം. ഇരുപത്തിനാലു മണിക്കൂറിൽ ഏറ്റവും കൂടുതൽ കാഴ്ചക്കാരെ ലഭിക്കുന്ന തെന്നിന്ത്യൻ ഗാനമായി മാറിയിരിക്കുകയാണ് ഇത്. പുഷ്പ എന്ന അല്ലു അർജുൻ ചിത്രത്തിലെ, സാമന്തയുടെ ഐറ്റം നമ്പർ ആയ ഓ ആണ്ടവ മാമ എന്ന ഗാനം ഇരുപത്തിനാലു മണിക്കൂർ കൊണ്ട് ഇട്ട റെക്കോർഡ് ഇരുപതു മണിക്കൂർ കൊണ്ടാണ് കലാവതി ഗാനം മറികടന്നത്. 12.4 മില്യൺ കാഴ്ചക്കാരെയാണ് ആദ്യ ഇരുപതു മണിക്കൂറു കൊണ്ട് ഈ ഗാനം നേടിയത്.
പരശുറാം സംവിധാനം ചെയ്തിരിക്കുന്ന ഈ ചിത്രത്തിന് സംഗീതം ഒരുക്കിയത് തമൻ എസ് ആണ്. സിദ് ശ്രീറാം ആലപിച്ചിരിക്കുന്നു ഈ ഗാനം രചിച്ചിരിക്കുന്നത് അനന്ത് ശ്രീറാം ആണ്. വെണ്ണല കിഷോർ, സുബ്ബരാജു എന്നിവരും അഭിനയിച്ചിരിക്കുന്ന ഈ ചിത്രം ഈ വർഷം മെയ് മാസത്തിൽ ആവും എത്തുക എന്നാണ് സൂചന. ആർ മതി കാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് മാർത്താണ്ട് കെ വെങ്കിടേഷ് ആണ്. സംവിധായകൻ പരശുറാം തന്നെയാണ് ഈ ചിത്രം രചിച്ചിരിക്കുന്നതും. നവീൻ, രവി ശങ്കർ, റാം, ഗോപി എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്.
