വിനയ് ഫോർട്ട്, അനു സിതാര എന്നിവരെ കേന്ദ്ര കഥാപാത്രമാക്കി സർജു രമാകാന്ത് സംവിധാനം ചെയ്ത ചിത്രമാണ് വാതിൽ. ഈ ചിത്രത്തിന്റെ ആദ്യ ടീസർ കഴിഞ്ഞ ഡിസംബറിൽ റിലീസ് ചെയ്യുകയും മികച്ച പ്രേക്ഷക ശ്രദ്ധ നേടുകയും ചെയ്തിരുന്നു. ഏതാനും ദിവസങ്ങൾക്ക് മുൻപാണ് ഇതിന്റെ റിലീസ് തീയതിയും പുറത്ത് വന്നത്. ഓണം റിലീസായി ഓഗസ്റ്റ് മുപ്പത്തിയൊന്നിനാണ് ഈ ചിത്രം പ്രദർശനത്തിന് എത്തുക. ഇപ്പോഴിതാ ഇതിലെ ഒരു ഗാനത്തിന്റെ വീഡിയോ റിലീസ് ചെയ്തിരിക്കുകയാണ്.
ജീവിതമെന്ന തമാശ എന്ന വരികളോടെ തുടങ്ങുന്ന ഈ ഗാനത്തിൽ റാപ് കൂടി കൂട്ടിച്ചേർത്താണ് റിലീസ് ചെയ്തിരിക്കുന്നത്. സെജോ ജോൺ വരികൾ രചിച്ചു സംഗീതം പകർന്ന ഈ ഗാനത്തിന് റാപ് രചിച്ചത് ഫെജോ ആണ്. ഷഹബാസ് അമൻ, ഫെജോ എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. വിനയ് ഫോർട്ട്, അനു സിതാര എന്നിവർക്കൊപ്പം കൃഷ്ണ ശങ്കറും പ്രധാന വേഷം ചെയ്യുന്ന ഈ ചിത്രത്തിൽ സുനിൽ സുഖദ, ഉണ്ണിരാജ്, അബിൻ ബിനോ, വി കെ ബൈജു, പോളി, മെറിൻ ഫിലിപ് എന്നിവരും അഭിനയിച്ചിട്ടുണ്ട്.
സ്പാർക്‌ പിക്‌ചേഴ്‌സിന്റെ ബാനറിൽ സുജി കെ ഗോവിന്ദരാജ്, രജീഷ് വളാഞ്ചേരി എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ഷംനാദ് ഷമീർ തിരക്കഥ രചിച്ച ഈ ചിത്രത്തിന് കാമറ ചലിപ്പിച്ചത് മനേഷ് മാധവനാണ്. ജോൺകുട്ടിയാണ് വാതിൽ എഡിറ്റ് ചെയ്തിരിക്കുന്നത്
