മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ നടനും സംവിധായകനും മാത്രമല്ല, ഏതാനും ഹിറ്റ് ഗാനങ്ങൾ ആലപിച്ചിട്ടുള്ള ഒരു ഗായകൻ കൂടിയാണ്. സാധാരണ താൻ അഭിനയിച്ച ചിത്രങ്ങൾക്ക് വേണ്ടിയാണു പൃഥ്വിരാജ് പാടാറുള്ളത് എങ്കിലും, ഇപ്പോൾ മലയാളത്തിലെ യുവ താരം പ്രണവ് മോഹൻലാൽ നായകനായി എത്തുന്ന ഹൃദയം എന്ന ചിത്രത്തിന് വേണ്ടി പൃഥ്വിരാജ് ആലപിച്ച ഗാനമാണ് പുറത്തു വന്നിരിക്കുന്നത്. പൃഥ്വിരാജ് ആലപിച്ച താതക തെയ്‌താരോ എന്ന് തുടങ്ങുന്ന ഈ ഗാനം റിലീസ് ചെയ്ത നിമിഷം മുതൽ സോഷ്യൽ മീഡിയയിൽ വൈറൽ ആണ്. വിനീത് ശ്രീനിവാസൻ രചിച്ചു സംവിധാനം ചെയ്ത ഈ ചിത്രത്തിലെ നാല് ഗാനങ്ങൾ ആണ് ഇതിനോടകം റിലീസ് ചെയ്തത്. അതിൽ മൂന്നെണ്ണം മലയാള ഗാനങ്ങളും ഒരെണ്ണം ഉണ്ണി മേനോൻ ആലപിച്ച ഒരു തമിഴ് ഗാനവുമാണ്. ആകെ മൊത്തം പതിനഞ്ചോളം ഗാനങ്ങൾ ആണ് ഈ ചിത്രത്തിൽ ഉള്ളതെന്നാണ് സൂചന. ഇതിലെ ദർശന എന്ന ഗാനം റിലീസ് ചെയ്ത നിമിഷം മുതൽ കേരളത്തിൽ ട്രെൻഡ് ആയി മാറിയ ഗാനമാണ്.
ഹിഷാം അബ്ദുൽ വഹാബ് ആണ് ഈ ചിത്രത്തിലെ ഗാനങ്ങൾക്ക് ഈണം പകർന്നിരിക്കുന്നത്. വിശ്വജിത് ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് രഞ്ജൻ എബ്രഹാം ആണ്. കല്യാണി പ്രിയദർശൻ, ദർശന രാജേന്ദ്രൻ എന്നിവർ നായികമാരായി എത്തുന്ന ഹൃദയത്തിൽ അജു വർഗീസും വിജയ രാഘവനും തുടങ്ങി ഒട്ടേറെ താരങ്ങൾ അഭിനയിക്കുന്നുണ്ട്. മെറിലാൻഡ് സിനിമാസിന്റെ ബാനറില്‍ വിശാഖ് സുബ്രഹ്മണ്യം നിര്‍മിക്കുന്ന ഈ ചിത്രം ജനുവരി ഇരുപത്തിയൊന്നിന് ആണ് ആഗോള റിലീസ് ആയി എത്തുന്നത്.
