മലയാളത്തിലെ യുവ താരങ്ങളിൽ പ്രധാനിയായ ടോവിനോ തോമസ് ജിമ്മിൽ ഏറെ സമയം ചെലവഴിക്കുന്ന, തന്റെ ശരീര സൗന്ദര്യത്തിനും ആരോഗ്യത്തിനും ഏറെ പ്രാധാന്യം നൽകുന്ന നടന്മാരിലൊരാളാണ്. കഴിഞ്ഞ മൂസ മാസമായി ലോക്ക് ഡൌൺ മൂലം സിനിമാ തിരക്കുകൾ ഇല്ലാത്തതു കൊണ്ട് തന്നെ ടോവിനോ തന്റെ ശരീര സംരക്ഷണത്തിന് ഒട്ടേറെ സമയം ചിലവഴിക്കുന്നുണ്ട്. സോഷ്യൽ മീഡിയയിലും ഈ കാലയളവിൽ പതിവിലും കൂടുതൽ സജീവമായ ടോവിനോ, തന്റെ ജിം വർക്ക് ഔട്ട് വീഡിയോകളും ഇൻസ്റ്റാഗ്രാം വഴി ആരാധകർക്കായി പങ്കു വെക്കാറുണ്ട്. അതിൽ കൂടുതലും വലിയ രീതിയിലാണ് ശ്രദ്ധ നേടാറുള്ളത്. ഇപ്പോഴിതാ ടോവിനോ തോമസ് പുറത്തു വിട്ട പുതിയ ജിം വർക്ക് ഔട്ട് വീഡിയോയാണ് സോഷ്യൽ മീഡിയയിൽ നിറയുന്നത്. പ്രജ എന്ന മോഹൻലാൽ- ജോഷി ചിത്രത്തിലെ, ഷമ്മി തിലകൻ അവതരിപ്പിച്ച ബലരാമൻ എന്ന കഥാപാത്രം മോഹൻലാലിന്റെ സക്കീർ ഹുസൈൻ എന്ന കഥാപാത്രത്തോട് പറയുന്ന സൂപ്പർ ഹിറ്റ് ഡയലോഗ് ചെറിയ രീതിയിൽ മാറ്റി, ക്യാപ്‌ഷനായി ഇട്ടു കൊണ്ടാണ് ടോവിനോ പുതിയ വീഡിയോ പങ്കു വെച്ചിരിക്കുന്നതെന്നതാണ് ഏറെ രസകരം.
https://www.instagram.com/p/CBcwkc0HS6b/
ഇങ്ങനെ തലകുത്തി നില്ക്കാൻ പറ്റുമോ സക്കീർ ഭായിക്ക്, എനിക്ക് പറ്റും, എന്ന് പറഞ്ഞു കൊണ്ട് ജിമ്മിൽ കൈമസിലുകളുടെ സഹായത്താൽ തലകുത്തി നിൽക്കുന്ന ഒരു വീഡിയോയാണ് ടോവിനോ തോമസ് പുറത്തു വിട്ടത്. ഏതായാലും ആ വീഡിയോയും അതിനു കൊടുത്ത തലക്കെട്ടും വൻ ഹിറ്റായി മാറിക്കഴിഞ്ഞു. കുറച്ചു ദിവസം മുൻപ് മലയാളത്തിലെ മറ്റൊരു ജിമ്മനായ അബു സലിം മുന്നോട്ടു വെച്ച പുഷ്അപ് വെല്ലുവിളിയും സ്വീകരിച്ചു കൊണ്ട് ടോവിനോ ഒരു വീഡിയോ പുറത്തു വിടുകയും വലിയ പ്രശംസ നേടിയെടുക്കുകയും ചെയ്തിരുന്നു. മലയാളത്തിലെ ആദ്യത്തെ സൂപ്പർ ഹീറോ ചിത്രമായ, ബേസിൽ ജോസെഫിന്റെ മിന്നൽ മുരളിയിലാണ് ടോവിനോ തോമസ് ലോക്ക് ഡൗണിനു മുൻപ് അഭിനയിച്ചു കൊണ്ടിരുന്നത്.
