ജയില്‍ പശ്ചാത്തലമായി വന്ന ഭൂതക്കണ്ണാടി, നിറക്കൂട്ട്, മതിലുകള്‍, ന്യൂഡല്‍ഹി, മുന്നറിയിപ്പ് തുടങ്ങിയ ചിത്രങ്ങള്‍ക്ക് ശേഷം ശ്രദ്ധേയ കഥാപാത്രവുമായി മമ്മൂട്ടി എത്തുന്ന ചിത്രമാണ് ‘പരോൾ’. നവാഗതനായ ശരത് സന്ദിത് സംവിധാനം ചെയ്യുന്ന ഈ ചിത്രത്തിൽ മമ്മൂട്ടിയുടെ നായികയായി എത്തുന്നത് ഇനിയ ആണ്. മമ്മൂട്ടി അവതരിപ്പിക്കുന്ന കഥാപാത്രത്തിന്റെ ഭാര്യാവേഷമാണ് ഇനിയയ്ക്ക്. നേരത്തെ രഞ്ജിത്ത് സംവിധാനം ചെയ്ത മമ്മൂട്ടി ചിത്രമായപുത്തൻ പണത്തിൽ ഇനിയ അഭിനയിച്ചിട്ടുണ്ടെങ്കിലും ഇരുവർക്കും ഒരുമിച്ചു സീനുകൾ ഇല്ലായിരുന്നു. അതിന് ശേഷമാണ് പരോളിലേക്ക് മമ്മൂട്ടിയുടെ നായികയാവാനുള്ള അവസരം ഇനിയയെ തേടി വന്നത്. ചിത്രത്തിൽ തന്റെ ഭാഗങ്ങള്‍ ഏകദേശം ഷൂട്ട് ചെയ്‌തുകഴിഞ്ഞുവെന്നും ഇനി പാട്ട് രംഗങ്ങള്‍ മാത്രമെ ബാക്കിയുള്ളുവെന്നും ഇനിയ വ്യക്തമാക്കിയിരുന്നു.
ഇനിയയെ കൂടാതെ മിയയും ചിത്രത്തിൽ ഒരു പ്രധാനവേഷം അവതരിപ്പിക്കുന്നുണ്ട്. സിദ്ദിഖ്, സുരാജ് വെഞ്ഞാറമൂട് തുടങ്ങിയവരാണ് മറ്റ് പ്രധാന താരങ്ങൾ.ചിത്രത്തിന്റെ ആദ്യ ഷെഡ്യൂളിന്റെ ചിത്രീകരണം ബാംഗ്ലൂരിൽ പൂർത്തിയായി. അജിത് പൂജപ്പുരയാണ് തിരക്കഥ. പരോളിന്റെ ചിത്രീകരണം പൂർത്തിയായ ശേഷം രൗദ്രം, കസബ, മാസ്റ്റർ പീസ് തുടങ്ങിയ ഒട്ടേറെ മമ്മൂട്ടിച്ചിത്രങ്ങളിൽ അസോസിയേറ്റായിരുന്ന ഷാജി പാടൂർ ആദ്യമായി സംവിധാനം ചെയ്യുന്ന അബ്രാഹ്മിന്റെ സന്തതികളിലാണ് മമ്മൂട്ടി അഭിനയിക്കുന്നത്. ചിത്രത്തിൽ മമ്മൂട്ടി പൊലീസ് വേഷമാണ് അവതരിപ്പിക്കുന്നത്.
