യുവ സൂപ്പർ താരം പൃഥ്വിരാജ് സുകുമാരൻ ഒരു കടുത്ത മോഹൻലാൽ ആരാധകനാണ് താൻ എന്നും അതുകൊണ്ടു തന്നെ താൻ ആദ്യമായി സംവിധാനം ചെയ്യുന്ന ചിത്രത്തിൽ മോഹൻലാൽ നായകനായി എത്തണം എന്നാണ് ആഗ്രഹം എന്നും വർഷങ്ങൾക്കു മുൻപേ പറഞ്ഞിരുന്നു. ഇപ്പോഴിതാ, ആ ആഗ്രഹം പൃഥ്‌വി പൂർത്തിയാക്കി കഴിഞ്ഞു. ലൂസിഫർ എന്ന തന്റെ ആദ്യ സംവിധാന സംരംഭം മോഹൻലാലിനെ നായകനാക്കി പൃഥ്വിരാജ് ഒരുക്കുകയും ആ ചിത്രം ഈ വരുന്ന മാർച്ചിൽ റിലീസ് ആവാൻ പോവുകയുമാണ്. അങ്ങനെയിരിക്കെ ആണ് കഴിഞ്ഞ ദിവസം ഒരു ഫേസ്ബുക് ലൈവിൽ മമ്മൂട്ടിയെ വെച്ച് എന്നാണ് ഒരു സിനിമ എന്നത് ഒരു ആരാധകൻ പൃഥ്വിരാജ് സുകുമാരനോട് ചോദിച്ചത്.
മമ്മൂട്ടിയോട് ഒപ്പമുള്ള സിനിമയും തന്റെ സ്വപ്നങ്ങളിൽ ഒന്നാണെന്നും അദ്ദേഹം ലോകം കണ്ട മികച്ച നടന്മാരിൽ ഒരാളാണെന്നും പൃഥ്‌വി പറയുന്നു . അദ്ദേഹത്തെ വെച്ച് താൻ എന്നെങ്കിലും ഒരു ചിത്രം ചെയ്യുകയാണെങ്കിൽ അത് മമ്മൂട്ടി എന്ന നടനോടുള്ള ഒരു ആദരവ് ആയിരിക്കും എന്നും അത് കൊണ്ട് തന്നെ അദ്ദേഹത്തെ അർഹിക്കുന്ന ഒരു മികച്ച തിരക്കഥ ലഭിക്കാൻ ആയി കാത്തിരിക്കുകയാണ് എന്നും പൃഥ്‌വി പറയുന്നു. അദ്ദേഹത്തെ പോലെ ഒരു നടനെ വെച്ച് വെറുതെ ഒരു ചിത്രം ഒരുക്കാൻ പറ്റില്ലെന്നും അങ്ങനെ ചെയ്താൽ അത് താൻ അദ്ദേഹത്തെ അപമാനിക്കുന്നതിനു തുല്യമായിരിക്കും എന്നും പൃഥ്വിരാജ് പറഞ്ഞു . ഇന്ന് പൃഥ്വിരാജ് നായകനായ നയൻ എന്ന ബിഗ് ബജറ്റ് ചിത്രം തീയേറ്ററുകളിൽ എത്തുകയാണ്. ജെനൂസ് മുഹമ്മദ് രചിച്ചു സംവിധാനം ചെയ്ത ഈ ചിത്രം തന്റെ പുതിയ പ്രൊഡക്ഷൻ ബാനറിൽ നിർമ്മിച്ചതും പൃഥ്വിരാജ് തന്നെയാണ്.
