ബോളിവുഡിലെ ഏറ്റവും പ്രശസ്തനായ സംവിധായകനും സംഗീത സംവിധായകനുമാണ് വിശാൽ ഭരദ്വാജ്. വിശാൽ ഭരദ്വാജ് ഒരുക്കിയ ചിത്രങ്ങളും സംഗീതവും എന്നും പ്രേക്ഷകർക്ക് പ്രീയപെട്ടതാണ്. ജനപ്രിയതയും നിരൂപക പ്രശംസയും ഒരുപോലെ നേടിയ ചിത്രങ്ങളും സംഗീതവും ആയിരുന്നു വിശാൽ ഭരദ്വാജ് ഒരുക്കിയത്. ഒരു രചയിതാവ്, സംവിധായകൻ, സംഗീത സംവിധായകൻ, നിർമ്മാതാവ് എന്നൊക്കെയുള്ള എല്ലാ നിലകളിലും വിശാൽ ഭരദ്വാജ് മാജിക് ബോളിവുഡ് കണ്ടതാണ്. ആ പ്രതിഭയുടെ സംഗീതം ഒരിക്കൽ മാത്രമേ മലയാള സിനിമയിലെത്തിയിരുന്നുള്ളു. വേണു ഒരുക്കിയ ദയ എന്ന ചിത്രത്തിലൂടെ ആയിരുന്നു വിശാൽ ഭരദ്വാജ് മോളിവുഡിൽ എത്തിയത്. ഇപ്പോഴിതാ വേണു തന്നെ ഒരുക്കിയ കാർബൺ എന്ന ചിത്രത്തിലൂടെ വിശാൽ ഭരദ്വാജ് മാജിക് വീണ്ടും മോളിവുഡിൽ എത്തി കഴിഞ്ഞു.
ഫഹദ് ഫാസിൽ നായകനായ കാർബൺ എന്ന ചിത്രത്തിന് സംഗീതം ഒരുക്കിയത് വിശാൽ ആണ്. കുറച്ചു ദിവസം മുൻപേ ഈ ചിത്രത്തിന്റെ ഓഡിയോ ലോഞ്ച് നടന്നു. തന്നെ താനെ എന്ന് തുടങ്ങുന്ന ഒരു ഗാനത്തിന്റെ വിഡിയോയും രണ്ടു ദിവസം മുൻപേ റിലീസ് ചെയ്തിരുന്നു. ഈ ഗാനം മികച്ച പ്രേക്ഷക പ്രതികരണം ആണ് നേടുന്നത്.രണ്ടു ഗാനങ്ങൾ ആണ് വിശാൽ ഭരദ്വാജ് കാര്ബണിന് വേണ്ടി ഒരുക്കിയത്. ആ രണ്ടു ഗാനങ്ങളും ഗംഭീരമായിട്ടുണ്ട് എന്നാണ് റിപ്പോർട്ടുകൾ സൂചിപ്പിക്കുന്നത്.
വിശാൽ ഭരദ്വാജിനൊപ്പം ബോളിവുഡ് ക്യാമറാമാനും മലയാളിയുമായ കെ യു മോഹനനും ഈ ചിത്രത്തിൽ ജോലി ചെയ്തിട്ടുണ്ട്. മമത മോഹൻദാസ് നായിക ആയെത്തിയ ഈ ചിത്രത്തിൽ ദിലീഷ് പോത്തൻ, നെടുമുടി വേണു, സൗബിൻ ഷാഹിർ, മണികണ്ഠൻ ആചാരി എന്നിവരും അഭിനയിക്കുന്നു. പോയട്രി ഫിലിമ്സിന്റെ ബാനറിൽ സിബി തോട്ടുപുറം, നാവിസ് സേവ്യർ എന്നിവരാണ് ഈ ചിത്രം നിർമ്മിച്ചിരിക്കുന്നത്.
