സത്യൻ അന്തിക്കാടിന്റെ മകൻ അനൂപ് സത്യൻ ആദ്യമായി സംവിധാനം ചെയ്ത വരനെ ആവശ്യമുണ്ട് എന്ന ചിത്രം ഇന്ന് മുതൽ റിലീസായി എത്തുകയാണ്. യുവ താരം ദുൽഖർ സൽമാൻ ആദ്യമായി നിർമ്മിക്കുന്ന ഈ ചിത്രത്തിൽ സുരേഷ് ഗോപി, ശോഭന, ദുൽഖർ സൽമാൻ, കല്യാണി പ്രിയദർശൻ, ഉർവശി എന്നിവരാണ് പ്രധാന വേഷങ്ങൾ ചെയ്യുന്നത്. ദുൽഖർ സൽമാൻ ആരംഭിച്ച വെ ഫെറർ ഫിലിംസിന്റെ ആദ്യ നിർമ്മാണ സംരംഭമാണ് ഈ ഫാമിലി എന്റെർറ്റൈനെർ. കേരളത്തിലെ നൂറിലധികം തീയേറ്ററുകളിൽ ഇന്ന് റിലീസ് ചെയ്യുന്ന ഈ ചിത്രം മമ്മൂട്ടിയുടെ ഉടമസ്ഥതയിലുള്ള പ്ളേ ഹൌസ് റിലീസാണു വിതരണം ചെയ്തിരിക്കുന്നത്. അൽഫോൻസ് ജോസഫ് ആണ് ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത്. കെ പി എ സി ലളിത, ലാലു അലക്സ്, സിജു വിൽസൺ, ജോണി ആന്റണി എന്നിവരും അഭിനയിക്കുന്ന ഈ ചിത്രം സുരേഷ് ഗോപി, ശോഭന എന്നിവരുടെ ഏറെക്കാലത്തിനു ശേഷമുള്ള ഒരു മടങ്ങി വരവ് കൂടിയാണ്.
ഇതിന്റെ ടീസർ, ട്രൈലെർ, വീഡിയോ സോങ് എന്നിവ വലിയ രീതിയിലാണ് പ്രേക്ഷകരുടെ ശ്രദ്ധ നേടിയത്. ഒരു ഫീൽ ഗുഡ് ഫാമിലി എന്റർടൈനറായിരിക്കും ഈ ചിത്രമെന്ന ഫീലാണ് ഇതിന്റെ ട്രൈലെർ നൽകുന്നത്. പ്രിയദർശന്റെ മകളായ കല്യാണി പ്രിയദർശന്റെ ആദ്യ മലയാളം റിലീസ് കൂടിയാണ് ഈ ചിത്രം. ഇനി മോഹൻലാൽ- പ്രിയദർശൻ ചിത്രം മരക്കാർ അറബിക്കടലിന്റെ സിംഹം, വിനീത് ശ്രീനിവാസൻ- പ്രണവ് മോഹൻലാൽ ചിത്രം ഹൃദയം എന്നിവയും കല്യാണി അഭിനയിച്ചു ഈ വർഷം റിലീസ് ചെയ്യാൻ പോകുന്ന ചിത്രങ്ങളാണ്.
