യുവ സൂപ്പർ താരം പൃഥ്വിരാജ് സുകുമാരൻ- ബിജു മേനോൻ എന്നിവരെ കേന്ദ്ര കഥാപാത്രങ്ങളാക്കി പ്രശസ്ത സംവിധായകനും രചയിതാവുമായ സച്ചി ഒരുക്കിയ പുതിയ ചിത്രമാണ് അയ്യപ്പനും കോശിയും. പൃഥ്വിരാജ് റിട്ടയേർഡ് ഹവിൽദാർ കോശി ആയും ബിജു മേനോൻ പോലീസ് കോൺസ്റ്റബിൾ അയ്യപ്പൻ ആയും എത്തുന്ന ഈ ചിത്രം അനാർക്കലിക്ക് ശേഷം സച്ചി രചിച്ചു സംവിധാനം ചെയ്ത ചിത്രമാണ്. ഒരു മാസ്സ് ചിത്രമായി ഒരുക്കിയിരിക്കുന്ന അയ്യപ്പനും കോശിയും നിർമ്മിച്ചിരിക്കുന്നത് ഗോൾഡ് കോയിൻ മോഷൻ പിക്‌ചേഴ്‌സിന്റെ ബാനറിൽ സംവിധായകൻ രഞ്ജിത്തും പി എം ശശിധരനും ചേർന്നാണ്. രഞ്ജിത് ഈ ചിത്രത്തിൽ ഒരു പ്രധാന കഥാപാത്രത്തിന് കൂടി ജീവൻ നൽകുന്നുണ്ട്. പൃഥ്വിരാജ് കഥാപാത്രമായ കോശിയുടെ അപ്പനായ കുര്യനായാണ് രഞ്ജിത് ഈ ചിത്രത്തിലഭിനയിക്കുന്നതു. ഇന്ന് കേരളത്തിൽ വമ്പൻ റിലീസായി എത്തുന്ന ഈ ചിത്രം പൃഥ്വിരാജിന് തുടർച്ചയായ രണ്ടാം വിജയം നൽകുമോ എന്നറിയാനുള്ള ആകാംക്ഷയിലാണ് ആരാധകർ.
സച്ചി രചിച്ചു ലാൽ ജൂനിയർ സംവിധാനം ചെയ്ത ഡ്രൈവിംഗ് ലൈസെൻസ് എന്ന പൃഥ്വിരാജ്- സുരാജ് വെഞ്ഞാറമൂട് ചിത്രം ഡിസംബർ മാസത്തിൽ റിലീസ് ചെയ്യുകയും സൂപ്പർ ഹിറ്റായി മാറുകയും ചെയ്തിരുന്നു. അട്ടപ്പാടിയിൽ ഷൂട്ട് ചെയ്തിരിക്കുന്ന അയ്യപ്പനും കോശിയും എന്ന ഈ ചിത്രത്തിൽ ഒരു വലിയ താര നിര തന്നെ അണിനിരക്കുന്നുണ്ട്. അന്ന രാജൻ, സാബു മോൻ, അനിൽ നെടുമങ്ങാട് തുടങ്ങി ഒട്ടേറെ പേര് ഈ ചിത്രത്തിന്റെ ഭാഗമാണ്. സുദീപ് ഇളമൻ ഛായാഗ്രഹണം നിർവഹിച്ച ഈ ചിത്രത്തിന് സംഗീതമൊരുക്കിയത് ജേക്സ് ബിജോയ് ആണ്. ഇതിലെ രണ്ടു ഗാനങ്ങൾ ഇതിനോടകം സോഷ്യൽ മീഡിയ ഏറ്റെടുത്തു കഴിഞ്ഞു. കൂടാതെ ഇതിന്റെ ട്രെയ്‌ലറും വലിയ പ്രതികരണമാണ് നേടിയത്.
