മെഗാ സ്റ്റാർ മമ്മൂട്ടി നായകനായി എത്തുന്ന ഉണ്ട എന്ന ചിത്രം വരുന്ന ജൂണ് 14 ന് ആഗോള റീലീസ് ആയി എത്തുകയാണ്. ഇന്ന് സെന്സറിങ് കഴിഞ്ഞ ഈ ചിത്രത്തിന് ക്ലീൻ യൂ സർട്ടിഫിക്കറ്റ് ആണ് ലഭിച്ചിരിക്കുന്നത്. രണ്ടു മണിക്കൂർ പത്തു മിനിറ്റിനു മുകളിൽ ആണ് ചിത്രത്തിന്റെ ദൈർഘ്യം എന്നും ചിത്രത്തിന്റെ ഗൾഫ് റിലീസ് ജൂൺ 19 നു ആയേക്കും എന്നും റിപ്പോർട്ടുകൾ വരുന്നുണ്ട്. മാവോയിസ്റ്റ് ഭീഷണി നില നിൽക്കുന്ന ഛത്തീസ്ഗഡിൽ തിരഞ്ഞെടുപ്പ് ജോലിക്കായി പോവേണ്ടി വരുന്ന കേരളാ പോലീസ് ഉദ്യോഗസ്ഥരുടെ കഥയാണ് ഈ ചിത്രം പറയുന്നത്. മികച്ച പ്രേക്ഷക പ്രതികരണം ആണ് കുറച്ചു ദിവസം മുൻപ് റീലീസ് ചെയ്ത ഉണ്ടയുടെ ട്രയ്ലർ നേടിയെടുത്തത്. കേരളാ പൊലീസിന് എന്നും അഭിമാനം ആവുന്ന ഒരു ചിത്രമായി ഉണ്ട മാറും എന്നും മമ്മൂട്ടിയുടെ കരിയറിലെ മികച്ച ചിത്രങ്ങളിൽ ഒന്നായിരിക്കും ഉണ്ട എന്നും അണിയറ പ്രവർത്തകർ അവകാശപ്പെടുന്നുണ്ട്.
2016 ഇൽ അനുരാഗ കരിക്കിൻ വെള്ളം എന്ന സൂപ്പർ ഹിറ്റ് ചിത്രം ഒരുക്കിയ ഖാലിദ് റഹ്മാൻ സംവിധാനം ചെയ്ത രണ്ടാമത്തെ ചിത്രമാണ് ഉണ്ട. നവാഗതനായ ഹർഷാദ് രചന നിർവഹിച്ച ഈ ചിത്രം നിർമ്മിച്ചിരിക്കുന്നത് മൂവി മിൽസിന്റെ ബാനറിൽ കൃഷ്ണൻ സേതുകുമാർ, ജമിനി സ്റ്റുഡിയോ എന്നിവർ ചേർന്നാണ്. ആസിഫ് അലി, വിനയ് ഫോർട്ട് എന്നിവർ അതിഥി വേഷത്തിൽ എത്തുന്ന ഈ ചിത്രത്തിൽ അർജുൻ അശോകൻ, ഷൈൻ ടോം ചാക്കോ, ജേക്കബ് ഗ്രിഗറി, കലാഭവൻ ഷാജോണ്, തുടങ്ങിയവരും ബോളിവുഡ് താരങ്ങളും അഭിനയിച്ചിരിക്കുന്നു. പ്രശാന്ത് പിള്ളൈ സംഗീതം പകർന്നിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് നിഷാദ് യൂസഫും ക്യാമറ ചലിപ്പിച്ചിരിക്കുന്നതു സജിത്ത് പുരുഷനും ആണ്.
