യുവ താരം ടോവിനോ തോമസ് ഇപ്പോൾ കൈ നിറയെ ചിത്രങ്ങളുമായി തിരക്കിലാണ്. അഖിൽ പോൾ ഒരുക്കിയ ഫോറൻസിക് എന്ന ചിത്രം പൂർത്തിയാക്കിയ ടോവിനോ തോമസ് ബേസിൽ ജോസഫ് ഒരുക്കുന്ന മിന്നൽ മുരളി എന്ന സൂപ്പർ ഹീറോ ചിത്രത്തിലും ജോയിൻ ചെയ്തു കഴിഞ്ഞു. അടുത്ത വർഷം ഏഴോളം റിലീസുകൾ ആണ് ടോവിനോയുടെതായി നമ്മുടെ മുന്നിൽ എത്തുക എന്നാണ് സൂചന. ഇപ്പോഴിതാ മഴവിൽ മനോരമ ചാനലിൽ സുരേഷ് ഗോപി അവതരിപ്പിക്കുന്ന നിങ്ങൾക്കുമാകാം കോടീശ്വരൻ പരിപാടിയിൽ മത്സരിക്കാൻ എത്തിയ ടോവിനോ 12 ലക്ഷം രൂപ നേടിയാണ് മടങ്ങിയത്.
എന്നാൽ ഈ തുക ടോവിനോ നല്കാൻ പോകുന്നത് ഫോറൻസിക് എന്ന ചിത്രത്തിൽ തനിക്കൊപ്പം ജോലി ചെയ്ത ചിത്രത്തിന്റെ ആർട് ഡിപ്പാർട്മെന്റിലെ സുതൻ എന്ന വ്യക്തിക്ക് ആണ്. അദ്ദേഹത്തിന് വീട് വെക്കാനാണ് ടോവിനോ ഈ പണം നല്കാൻ പോകുന്നത്. ചിത്രത്തിന്റെ സംവിധായകൻ ആയ അഖിൽ പോൾ തന്നെയാണ് ഈ വിവരം ഏവരെയും അറിയിച്ചത്. തന്റെ നല്ല മനസ്സും പ്രവർത്തനങ്ങളും കൊണ്ട് ഒട്ടേറെ പേരുടെ കയ്യടി നേടിയ വ്യക്തിയാണ് ടോവിനോ തോമസ്. ഇപ്പോഴിതാ ഒരിക്കൽ കൂടി നന്മ നിറഞ്ഞ ഒരു പ്രവർത്തി കൊണ്ട് സോഷ്യൽ മീഡിയയുടെ കയ്യടി നേടിയെടുക്കുകയാണ് ഈ താരം.
കിലോമീറ്റർസ് ആൻഡ് കിലോമീറ്റർസ് എന്ന ചിത്രമാണ് ടോവിനോയുടെ അടുത്ത റിലീസ്. ഇത് കൂടാതെ ഫോറൻസിക്, മിന്നൽ മുരളി, പള്ളി ചട്ടമ്പി, തല്ലുമാല , ഭൂമി, 563 ചാൾസ് സ്ട്രീറ്റ് എന്നീ ചിത്രങ്ങളും അടുത്ത വർഷം ടോവിനോ നായകനായി എത്തും എന്നാണ് സൂചന.
