നവാഗതനായ ഡൊമിനിക് അരുൺ സംവിധാനം ചെയ്യുന്ന ടോവിനോ ചിത്രം തരംഗത്തിലെ ആദ്യ വീഡിയോ ഗാനം ഇന്ന് റിലീസ് ചെയ്യുന്നു. ഏതാനും ദിവസങ്ങൾക്ക് മുന്നേ പുറത്തിറങ്ങിയ ‘മിന്നുണ്ടല്ലോ മുല്ലപോലെ’ എന്ന ഗാനം ഇതിനോടകം ഹിറ്റായിരുന്നു . അങ്ങനെയിരിക്കെയാണ് അതിന്റെ വീഡിയോ ഗാനം ഇന്ന് റീലീസ് ചെയ്യുന്നു എന്ന വാർത്ത അണിയറപ്രവർത്തകർ പുറത്തു വിട്ടത്.
സിനിമ പ്രേക്ഷകർക്ക് ഏറെ പ്രതീക്ഷയുള്ള ടോവിനോ ചിത്രമാണ് തരംഗം. തമിഴ് സൂപ്പർ താരം ധനുഷിന്റെ പ്രൊഡക്ഷൻ ആയ വണ്ടർബാർസ് ആണ് ചിത്രം നിർമിക്കുന്നത്. ധനുഷ് നിർമിക്കുന്ന ആദ്യ മലയാളചിത്രം എന്ന പ്രത്യേകതയും തരംഗത്തിന് ഉണ്ട്.
ടോവിനോക്കൊപ്പം ബാലു വർഗീസ്, വേദിക എന്നിവരും ചിത്രത്തിൽ കേന്ദ്രകഥാപാത്രങ്ങൾ ആവുന്നുണ്ട്. അശ്വിൻ രഞ്ജു സംഗീതം നിർവഹിക്കുന്ന തരംഗത്തിന്റെ ഛായാഗ്രാഹകൻ ദീപക് ഡി മേനോൻ ആണ്.
മൃത്യുഞ്ജയം എന്ന ഏറെ ശ്രദ്ധേയമായ ഷോർട്ട് ഫിലിം സംവിധാനം ചെയ്ത ഡൊമിനിക് അരുണിന്റെ ആദ്യ മുഴുനീള ചിത്രമാണ് തരംഗം.
