മലയാളത്തിന്റെ മെഗാ സ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രം സംവിധാനം ചെയ്യാൻ പോകുന്നത് പ്രശസ്ത സംവിധായകനും രചയിതാവുമായ ബി ഉണ്ണികൃഷ്ണനാണ്. ഉദയ കൃഷ്ണ രചന നിർവഹിക്കുന്ന ഈ മമ്മൂട്ടി ചിത്രം നിർമ്മിക്കുന്നതും ബി ഉണ്ണികൃഷ്ണൻ തന്നെയാണ്. ഒരു ഇൻവെസ്റ്റിഗേഷൻ ത്രില്ലറായി ഒരുക്കാൻ പോകുന്ന ഈ ചിത്രം ഒരു മെഗാ ബഡ്ജറ്റ് ചിത്രമായാണ് എത്തുന്നത്. ഇപ്പോഴിതാ ഈ ചിത്രത്തിന്റെ താരനിരയുടെ ചില വിശദാംശങ്ങൾ പുറത്തു വരികയാണ്. മൂന്നു നായികമാരാണ് ഈ ചിത്രത്തിലുള്ളതെന്നാണ് ക്യാൻ ചാനൽ മീഡിയ റിപ്പോർട്ട് ചെയ്യുന്നത്. സ്നേഹ, അമല പോൾ, ഐശ്വര്യ ലക്ഷ്മി എന്നിവരാണ് ഈ ചിത്രത്തിലെ നായികാ വേഷങ്ങൾ ചെയ്യുന്നതെന്നാണ് അവരുടെ റിപ്പോർട്ട് പറയുന്നത്. നേരത്തെ മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യർ, തമിഴിലെ ലേഡി സൂപ്പർ സ്റ്റാർ നയൻതാര എന്നിവരുടെ പേരുകളും സോഷ്യൽ മീഡിയയിൽ പ്രചരിച്ചിരുന്നു.
ഇവരെ കൂടാതെ ബോളിവുഡ് താരം രവീണ ടണ്ടൻ ഈ ചിത്രത്തിന്റെ ഭാഗമാകുമെന്നും വാർത്തകൾ വന്നിരുന്നു. ബിജു മേനോൻ, സിദ്ദിഖ്, എന്നിവരും ഇതിന്റെ താരനിരയിലുണ്ടെന്നു സൂചനകളുണ്ട്. ഏതായാലും ജൂലൈ പതിനഞ്ചിനാണ്‌ ഈ ചിത്രം ആരംഭിക്കാൻ പോകുന്നത്. പൂയംകുട്ടിയില്‍ ആരംഭിക്കുന്ന ഈ ചിത്രം പിന്നീട് എറണാകുളം, വണ്ടിപ്പെരിയാര്‍, കുട്ടിക്കാനം എന്നിവിടങ്ങളിലും ചിത്രീകരിക്കുമെന്നാണ് ലഭിക്കുന്ന വിവങ്ങൾ പറയുന്നത്. മെഗാ സ്റ്റാർ മമ്മൂട്ടി ഇതിൽ ജൂലൈ പതിനെട്ടോടെ ജോയിൻ ചെയ്യുമെന്നാണ് സൂചന. ഈ ചിത്രത്തിന് മുൻപ് റിലീസ് ചെയ്യാനുള്ള മമ്മൂട്ടി ചിത്രങ്ങൾ, ലിജോ ജോസ് പെല്ലിശ്ശേരി ഒരുക്കിയ നൻ പകൽ നേരത്തു മയക്കം, നിസാം ബഷീർ ഒരുക്കിയ റോഷാക്ക് എന്നിവയാണ്. ഇത് രണ്ടും നിർമ്മിച്ചിരിക്കുന്നതും മമ്മൂട്ടി തന്നെയാണ്.
