ആരാധകർക്ക് വീണ്ടും ആവേശം തീർക്കാൻ ഒരുങ്ങുകയാണ് ദളപതി വിജയ്. അദ്ദേഹത്തിന്റെ ഏറ്റവും പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ ഉടൻ പുറത്തിറങ്ങും. ഹിറ്റ് കൂട്ടുകെട്ടായ വിജയ് മുരുഗദോസ് ടീം എന്നും വിജയം മാത്രമേ തീർത്തിട്ടുള്ളൂ. ഇവർ വീണ്ടും ഒന്നിക്കുമ്പോൾ ആരാധക പ്രതീക്ഷ വാനോളമാണ്. ചിത്രത്തിന്റേതായി ഇതുവരെ ഒരു സ്റ്റില്ലുകളും പുറത്തുവന്നിരുന്നില്ല. അതിനാൽ തന്നെ പോസ്റ്റർ കാണുവാനായി ആരാധകർ വലിയ കാത്തിരിപ്പിലാണ്. വിജയുടെ പിറന്നാൾ ദിവസമായ ജൂണ് 22ന് ആയിരിക്കും ആദ്യ പോസ്റ്റർ പുറത്ത് വരുക. ഇതിന് മുൻപ് മുൻ ചിത്രമായ മെർസലും പിറന്നാൾ ദിവസം തന്നെയായിരുന്നു പുറത്ത് വന്നത്.
എ. ആർ. മുരുഗദോസിനൊപ്പം വിജയ് ഒരുക്കിയ മുൻ ചിത്രങ്ങൾ തുപ്പാക്കി, കത്തി എന്നിവ വലിയ വിജയങ്ങൾ ആയിരുന്നു. കൂടാതെ രണ്ടാം ചിത്രം രാഷ്ട്രീയമായും ഏറെ ചർച്ചയായി മാറിയിരുന്നു. അതിന് ശേഷം വീണ്ടുമൊരു പൊളിറ്റിക്കൽ ത്രില്ലറുമായി എത്തുമ്പോൾ എന്ത് വിഷയമാകും ചർച്ചയാവുക എന്ന ആകാംഷയിലാണ് പ്രേക്ഷക സമൂഹം. ചിത്രത്തിൽ വിജയോടൊപ്പം കീർത്തി സുരേഷ്, വരലക്ഷ്മി ശരത് കുമാർ തുടങ്ങിയവർ അഭിനയിക്കുന്നു. മുരുഗദോസ്സും ജെയമോഹനും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. എ. ആർ. റഹ്മാൻ ചിത്രത്തിന് സംഗീതം നൽകുന്നു. ഗിരീഷ് ഗംഗാധരൻ ചിത്രത്തിന്റെ ഛായാഗ്രഹണം ഒരുക്കുന്നു. സണ് പിക്ചേഴ്‌സ് നിർമ്മിച്ച ചിത്രം ദീപാവലി റിലീസായി തീയേറ്ററുകളിൽ എത്തും.
