ഈ വർഷം ഇന്ത്യൻ സിനിമയിൽ തന്നെ ഏറ്റവും കൂടുതൽ ജനപ്രീതി നേടിയ രണ്ട് കഥാപാത്രങ്ങളാണ് കെ ജി എഫിലെ യാഷ് കഥാപാത്രമായ റോക്കി ഭായിയും, വിക്രം എന്ന ചിത്രത്തിലെ സൂര്യ കഥാപാത്രമായ റോളെക്സും. യാഷിന്റെ റോക്കി ഭായ് മാസ്സ് നായകനാണെങ്കിൽ, സൂര്യയുടെ റോളക്സ് മാസ്സ് വില്ലനായാണ് വിക്രത്തിൽ എത്തിയത്. ഇപ്പോഴിതാ യാഷും സൂര്യയും ഒരുമിച്ചുള്ള ഒരു ചിത്രമാണ് സോഷ്യൽ മീഡിയയിൽ വൈറലായി മാറുന്നത്. ഈ ചിത്രം കണ്ട ആരാധകർ ചോദിക്കുന്നത്, കെ ജി എഫ് മൂന്നാം ഭാഗത്തിൽ സൂര്യയും ഉണ്ടോ എന്നാണ്. കെ ജി എഫ് 3 ഒഫീഷ്യൽ ആയി പ്രഖ്യാപിച്ചിട്ടില്ലെങ്കിലും, കെ ജി എഫ് ചാപ്റ്റർ 3 ഉണ്ടാകുമെന്നുള്ള സൂചന രണ്ടാം ഭാഗത്തിന്റെ അവസാനം തന്നെ അണിയറ പ്രവർത്തകർ തന്നിരുന്നു. അത്കൊണ്ട് തന്നെ വമ്പൻ താരനിരയായിരിക്കും ഈ ചിത്രത്തിലെന്നാണ് സൂചന. ആ കൂട്ടത്തിൽ സൂര്യയും ഉണ്ടാകുമോ എന്നാണ് ആരാധകരുടെ ആകാംഷ.
പ്രശാന്ത് നീൽ സംവിധാനം ചെയ്ത കെ ജി എഫ് സീരിസ് നിർമ്മിച്ചത് ഹോംബാലെ ഫിലിംസാണ്. ബോളിവുഡ് താരം സഞ്ജയ് ദത്താണ് കെ ജി എഫ് രണ്ടാം ഭാഗത്തിൽ വില്ലനായി എത്തിയത്. കമൽ ഹാസൻ നായകനായ വിക്രം എന്ന ചിത്രത്തിലാണ് സൂര്യ റോളക്സ് എന്ന വില്ലൻ വേഷം അണിഞ്ഞത്. ലോകേഷ് കനകരാജ് ഒരുക്കിയ ഈ ചിത്രത്തിൽ അതിഥി താരമായാണ് സൂര്യ വന്നത്. എന്നാൽ വിക്രം 3 എന്ന ചിത്രത്തിൽ പ്രധാന വേഷത്തിൽ കമൽ ഹാസനൊപ്പം സൂര്യ ഉണ്ടാകുമെന്ന് സംവിധായകനും കമൽ ഹാസനും വെളിപ്പെടുത്തിയിരുന്നു. കാർത്തി നായകനായ കൈതി കൂടെ ഉൾപ്പെടുന്ന ലോകേഷ് സിനിമാറ്റിക് യൂണിവേഴ്‌സാണ് വിക്രത്തിലൂടെ അദ്ദേഹം സൃഷ്ടിച്ചെടുത്തത്.
