മെഗാസ്റ്റാർ മമ്മൂട്ടിയുടെ അനുഗ്രഹം വാങ്ങി സൂപ്പർ സ്റ്റാർ സുരേഷ് ഗോപിയുടെ ഇളയ മകൻ മാധവ് സുരേഷ് മലയാള സിനിമയിലേക്ക്. സംവിധായകൻ പ്രവീൺ നാരായണൻ, ലൈൻ പ്രൊഡ്യൂസർ സജിത് കൃഷ്ണ എന്നിവർക്കൊപ്പം ആണ് മമ്മൂട്ടിയെ അദ്ദേഹത്തിൻ്റെ കൊച്ചിയിലെ വസതിയിലെത്തി മാധവ് കണ്ടത്. മാധവിനും ചിത്രത്തിനും മമ്മൂട്ടി വിജയാശംസകൾ നേർന്നു. സുരേഷ് ഗോപി നായകനായി കോസ്മോസ് എൻ്റർടെയ്ൻമെൻ്റിൻ്റെ ബാനറിൽ പ്രവീൺ നാരായണൻ എഴുതി സംവിധാനം ചെയ്യുന്ന ചിത്രത്തിലെ ഒരു സുപ്രധാന കഥാപാത്രത്തെ മാധവ് അവതരിപ്പിക്കും.
അനുപമ പരമേശ്വരൻ ആണ് ചിത്രത്തിലെ നായിക. ഷാജി കൈലാസ് സംവിധാനം ചെയ്‌ത സൂപ്പര്‍ ഹിറ്റ് ചിത്രം ചിന്താമണി കൊലക്കേസിനു ശേഷം സുരേഷ് ഗോപി വക്കീല്‍ വേഷത്തില്‍ എത്തുന്നു എന്ന പ്രത്യേകതയും ഈ ചിത്രത്തിനുണ്ട്. ചിത്രത്തിന്റെ പ്രഖ്യാപനം മുതൽ ആരാധകരും സിനിമ പ്രേമികളും ഒരുപോലെ കാത്തിരിക്കയാണ് സുരേഷ് ഗോപിയുടെ വക്കീൽ വേഷത്തിനായി. സത്യൻ അന്തിക്കാടിന്റെ മകൻ അനൂപ് സത്യൻ ഒരുക്കിയ ‘വരനെ ആവശ്യമുണ്ട്’ എന്ന ചിത്രത്തിൽ ചെറിയൊരു സീനിൽ മാധവ് അഭിനയിച്ചിരുന്നു. ചിത്രത്തിലെ ഫൈറ്റ് സീൻ മേക്കിങ് വീഡിയോ പിന്നീട് പുറത്തിറങ്ങിയതോടെയാണ് ഒരു ഫ്‌ളാറ്റിൽ നിന്നും എത്തിനോക്കുന്ന മുഖം മാധവ് സുരേഷിന്റേതായിരുന്നു എന്ന് മലയാളികൾ മനസ്സിലാക്കിയത്. സുരേഷ് ഗോപിയും അദ്ദേഹത്തിന്റെ മൂത്തമകൻ ഗോകുൽ സുരേഷും അഭിനയിച്ച പാപ്പൻ ആരാധകർ ഇരുകൈയ്യും നീട്ടി സ്വീകരിച്ചിരുന്നു. ദുൽഖർ സൽമാൻ, പ്രണവ് മോഹൻലാൽ, വിനീത് ശ്രീനിവാസൻ, ധ്യാൻ ശ്രീനിവാസൻ, കാളിദാസ് ജയറാം, ഗോകുൽ സുരേഷ് തുടങ്ങിയ താരപുത്രന്മാരുടെ നിരയിലേക്ക് മാധവ് സുരേഷും എത്തുന്നു. ജിബു ജേക്കബ് ഒരുക്കിയ മേ ഹും മൂസ എന്ന ചിത്രമാണ് സുരേഷ് ഗോപിയുടേതായി ഏറ്റവും ഒടുവിൽ റിലീസായത്.
