മലയാള സിനിമയിലെ പ്രശസ്ത നടനായ ഇന്ദ്രൻസ് ആണ് ഇപ്പോൾ സോഷ്യൽ മീഡിയയുടെ സംസാര വിഷയം. ഡോക്ടർ ബിജു സംവിധാനം ചെയ്ത വെയിൽ മരങ്ങൾ എന്ന ചിത്രത്തിലൂടെ ലോകത്തെ വലിയ ചലച്ചിത്ര മേളകളിൽ ഒന്നായ ഷാങ്ഹായ് ഫിലിം ഫെസ്റ്റിവലിൽ റെഡ് കാർപെറ്റ് വെൽകം കിട്ടിയ നടനായി മാറി ഇന്ദ്രൻസ്. അവിടെ ഈ വർഷം മത്സര വിഭാഗത്തിൽ പ്രദർശിപ്പിച്ച ഏക ഇന്ത്യൻ ചിത്രവുമായിരുന്നു വെയിൽ മരങ്ങൾ. എന്നാൽ ഇന്ദ്രൻസ് ഇത്ര വലിയ നേട്ടം അവിടെ സ്വന്തമാക്കിയിട്ടും മലയാള സിനിമയോ സോഷ്യൽ മീഡിയയോ അത് ആഘോഷമാക്കിയില്ല എന്ന ഒരു ആരോപണം സിനിമാ സ്നേഹികൾക്കിടയിൽ നിന്നുണ്ടായി. പക്ഷെ ഈ വിവരം അറിഞ്ഞ സമയത്തു തന്നെ ഇന്ദ്രൻസിനെ അഭിനന്ദിച്ചു ഫേസ്ബുക് പോസ്റ്റ് ഇട്ട മലയാളത്തിലെ യുവ താരം ആണ് സണ്ണി വെയ്ൻ.
അഭിമാനം എന്ന് പറഞ്ഞാണ് അദ്ദേഹം ഇന്ദ്രൻസിന്റെ ചിത്രം തന്റെ ഒഫീഷ്യൽ ഫേസ്ബുക് പേജ് വഴി പുറത്തു വിട്ടത്. ഏതായാലും ഇപ്പോൾ സോഷ്യൽ മീഡിയ ഇന്ദ്രൻസിന്റെ നേട്ടത്തിന് നേരെ കണ്ണ് തുറന്നിരിക്കുകയാണ്. ഏകദേശം ഇരുപതു വർഷം മുൻപ് മോഹൻലാലിന് ക്യാൻ ഫിലിം ഫെസ്റ്റിവലിൽ റെഡ് കാർപ്പറ്റ് വിരിച്ചു സ്വീകരണം നൽകിയിരുന്നു. മലയാള നടന്മാർക്ക് വളരെ അപൂർവമായി മാത്രം ലഭിച്ചിട്ടുള്ള ഒരു നേട്ടമാണ് ഇന്ദ്രൻസ് സ്വന്തമാക്കിയത്. മികച്ച നടനുള്ള സംസ്ഥാന പുരസ്‌കാരം വരെ നേടിയെടുത്ത ഇന്ദ്രൻസ് ഇപ്പോൾ കാമ്പുള്ള വേഷങ്ങളിലൂടെ മലയാള സിനിമാ പ്രേമികളെ വിസ്മയിപ്പിക്കുകയാണ്. ഇന്ദ്രൻസ് കേന്ദ്ര കഥാപാത്രം ആയി എത്തുന്ന ഒട്ടേറെ ചിത്രങ്ങൾ ആണ് ഇപ്പോൾ ഒരുങ്ങി കൊണ്ടിരിക്കുന്നത്.
