ബോളിവുഡ് സൂപ്പർ ഹീറോയിൻ ആയ സണ്ണി ലിയോണി തന്റെ ആദ്യ മലയാള ചിത്രത്തിൽ അഭിനയിച്ചു കഴിഞ്ഞു. മെഗാ സ്റ്റാർ മമ്മൂട്ടിയുടെ മധുര രാജ എന്ന ചിത്രത്തിൽ ആണ് സണ്ണി ലിയോണി ഇപ്പോൾ അഭിനയിച്ചു കഴിഞ്ഞത്. വൈശാഖ് സംവിധാനം ചെയ്യുന്ന ഈ ചിത്രത്തിൽ മമ്മൂട്ടിക്കും തമിഴ് യുവ താരം ജയ് ക്കും ഒപ്പം ഒരു ഐറ്റം ഡാൻസ് രംഗത്താണ് സണ്ണി ലിയോണി പ്രത്യക്ഷപ്പെടുന്നത്. ഈ ഗാന രംഗം തീർത്ത നടി ഉടൻ തന്നെ തന്റെ ആദ്യ മുഴുനീള മലയാള ചിത്രമായ രംഗീലയിൽ ജോയിൻ ചെയ്യും. ഇപ്പോഴിതാ മധുര രാജയുടെ വിശേഷങ്ങൾ പങ്കു വെക്കുകയാണ് ആരാധകരുടെ സ്വന്തം സണ്ണി ചേച്ചി.
മമ്മൂട്ടിയെ കാണണം എന്നും ഒപ്പം അഭിനയിക്കണമെന്നും ഏറെ ആഗ്രഹം ഉണ്ടായിരുന്നു എന്ന് സണ്ണി ലിയോണി പറയുന്നു. ആ ആഗ്രഹം സാധിച്ചതിന്റെ സന്തോഷത്തിൽ ആണ് താരം. മമ്മൂട്ടി ഇടപെടാൻ വളരെ എളുപ്പമുള്ള താരമാണ് എന്നും സണ്ണി ലിയോണി പറയുന്നു. മധുര രാജയിലെ തന്റെ ഐറ്റം ഡാൻസ് വലിയ ഹിറ്റ് ആയി മാറും എന്നാണ് സണ്ണി ലിയോണിയുടെ പ്രതീക്ഷ. ഒറ്റ തവണ കേട്ടാൽ തന്നെ മനസ്സിൽ കേറുന്ന ഈണമാണ് ഈ ഗാനത്തിന്റേത് എന്നും അവർ പറയുന്നു. ഗോപി സുന്ദർ ആണ് ഈ ചിത്രത്തിന് വേണ്ടി ഗാനങ്ങൾ ഒരുക്കിയത്. ഉദയ കൃഷ്ണ തിരക്കഥ രചിച്ച ഈ ചിത്രത്തിന്റെ ക്ലൈമാക്സ് സംഘട്ടനം ആണ് ഇപ്പോൾ ഷൂട്ട് ചെയ്യുന്നത്. നെൽസൻ ഐപ്പ് നിർമ്മിക്കുന്ന ഈ ബിഗ് ബഡ്ജറ്റ് ചിത്രം വരുന്ന വിഷു സീസണിൽ കേരളത്തിലെ തീയേറ്ററുകളിൽ എത്തും.
