തമിഴ് സിനിമയിൽ ഏറ്റവും ശ്രദ്ധേയമായ കൂട്ടുകെട്ടാണ് സൂര്യ- ഹരി എന്നിവരുടേത്. ഒരുപാട് ഹിറ്റ് ചിത്രങ്ങൾ ഈ കൂട്ടുകെട്ടിൽ നിന്ന് പിറന്നിട്ടുണ്ട്. ആര്, വേൽ, സിങ്കം, സിങ്കം 2, സിങ്കം 3 തുടങ്ങി കമർഷ്യൽ ഹിറ്റ് ചിത്രങ്ങൾ ഹരി സൂര്യയ്ക്ക് സമ്മാനിച്ചിട്ടുണ്ട്. സൂര്യയുടെ പുതിയ ചിത്രമായ സൂരറൈ പോട്രൂ ആമസോൺ പ്രൈമിൽ റിലീസിനായി ഒരുങ്ങുകയാണ്. സുധ കൊങ്കര സംവിധാനം ചെയ്തിരിക്കുന്ന സൂരറൈ പോട്രൂവിന്റെ ഒ.ടി.ടി റിലീസ് ചെയ്യുന്നതിൽ പ്രതിഷേധം അറിയിച്ചു കൊണ്ട് സംവിധായകൻ ഹരി രംഗത്ത് വന്നിരിക്കുകയാണ്.
ഒ.ടി.ടി റിലീസ് തീരുമാനത്തിൽ നിന്നും സൂര്യ പിന്മാറണം എന്ന് ആവശ്യപ്പെട്ടു കൊണ്ട് പരസ്യമായി ഒരു തുറന്ന് കത്ത് എഴുത്തിയിരിക്കുകയാണ് സിങ്കം സംവിധായകൻ ഹരി. ഹരിയുടെ പ്രസ്താവന ഇതിനോടകം സിനിമ രംഗത്ത് വലിയൊരു ചർച്ചയ്ക്ക് തന്നെ വഴിയൊരുക്കിയിരിക്കുകയാണ്. താങ്കളുമായി ഒരുമിച്ചു ജോലി ചെയ്ത സ്വാത്രന്ത്രത്തിൽ കുറച്ചു കാര്യങ്ങൾ പറയട്ടെ എന്ന് തുടങ്ങിയാണ് കത്ത് ആരംഭിക്കുന്നത്. ഒരു ആരാധകനായി താങ്കളുടെ ചിത്രങ്ങൾ തീയറ്ററിൽ കാണുന്നതാണ് ഇഷ്ടം എന്നും ഒ.ടി.ടി യിൽ അല്ല എന്ന് ഹരി വ്യക്തമാക്കി. നമ്മൾ ഒന്നിച്ചു ചെയ്ത സിനിമകൾക്ക് തിയറ്ററിൽ ആരാധകരിൽ നിന്നും കിട്ടിയ കൈയ്യടികളാലാണ് നമ്മളെ ഇത്രയും ഉയരത്തിൽ എത്തിച്ചെതെന്ന് സംവിധായകൻ സൂചിപ്പിക്കുകയുണ്ടായി. സിനിമ എന്ന തൊഴിൽ നമുക്ക് ദൈവം ആണെന്നും തീയറ്റർ എന്ന ക്ഷേത്രത്തിൽ ഇരിക്കുമ്പോൾ മാത്രമാണ് അതിന് മതിപ്പെന്ന് ഹരി തുറന്ന് പറയുകയുണ്ടായി. സൂര്യ- ഹരി കൂട്ടുകെട്ടിൽ അരുവ അണിയറയിൽ ഒരുങ്ങുന്നുണ്ട്.
