മെഗാ സ്റ്റാർ മമ്മൂട്ടിയെ നായകനാക്കി അജയ് വാസുദേവ് ഒരുക്കുന്ന പുതിയ ചിത്രമായ ഷൈലോക്കിന്റെ പൂജയും ടൈറ്റിൽ ലോഞ്ചും നടന്നത് ഏതാനും ദിവസങ്ങൾക്ക് മുൻപാണ്. രാജാധി രാജ, മാസ്റ്റർ പീസ് എന്നീ ചിത്രങ്ങൾക്കു ശേഷം അജയ് വാസുദേവ് ഒരുക്കുന്ന ചിത്രമാണ് ഷൈലോക്ക്. ഒരു മാസ്സ് എന്റർടെയ്ൻമെന്റ് മൂവി ആയി ഒരുക്കുന്ന ഈ ചിത്രം നവാഗതരായ ബിബിൻ മോഹൻ, അനീഷ് ഹമീദ് എന്നിവർ ചേർന്നാണ് രചിച്ചിരിക്കുന്നത്. അടുത്തിടെ ഫേസ്ബുക്കിൽ മമ്മൂട്ടി ആരാധകരുമായി സംവദിക്കുന്നതിനിടെ ഷൈലോക്കിന്റെ അണിയറ പ്രവർത്തകർ പറഞ്ഞത് മമ്മൂട്ടിയുടെ സൂപ്പർ വിജയങ്ങളിൽ ഒന്നായ രാജമാണിക്ക്യം പോലെ ഒരു മെഗാ മാസ്സ് ചിത്രമായിരിക്കും ഷൈലോക്ക് എന്നാണ്.
ഗുഡ് വിൽ എന്റർടെയ്ൻമെന്റ്സിന്റെ ബാനറിൽ ജോബി ജോർജ് ആണ് ഈ ചിത്രം നിർമ്മിക്കുന്നത്. മമ്മൂട്ടിക്കൊപ്പം പ്രശസ്ത തമിഴ് നടൻ രാജ് കിരണും നിർണ്ണായകമായ ഒരു വേഷം അവതരിപ്പിക്കുന്ന ഈ ചിത്രത്തിൽ വളരെ പിശുക്കനായ ഒരു പലിശക്കാരൻ ആയാണ് മമ്മൂട്ടി അഭിനയിക്കുന്നത്. ഒരു തമിഴനായി രാജ് കിരൺ അഭിനയിക്കുന്ന ഈ ചിത്രത്തിൽ അദ്ദേഹത്തിന്റെ നായിക ആയി എത്തുന്നത് പ്രശസ്ത നടി മീന ആണ്. മലയാളത്തിലും തമിഴിലും കൂടി നിർമ്മിക്കുന്ന ഒരു ബിഗ് ബഡ്ജറ്റ് ചിത്രമാണ് ഷൈലോക്ക്. ആഗസ്റ്റ് ഏഴു മുതല് ഈ സിനിമയുടെ ചിത്രീകരണം ആരംഭിക്കും. ക്രിസ്മസ് റീലീസ് ആയി തീയേറ്ററുകളിൽ എത്തും എന്നു പ്രതീക്ഷിക്കുന്ന ഈ ചിത്രത്തിനു വേണ്ടി റെനടിവെ ക്യാമറ ചലിപ്പിക്കും. ഇതിനു സംഗീതം ഒരുക്കുന്നത് ഗോപി സുന്ദറും എഡിറ്റിംഗ് നിർവഹിക്കുന്നത് റിയാസ് കെ ബാദറും ആണ്.
