ചുരുങ്ങിയ കാലം കൊണ്ട് തന്നെ മികച്ച കഥാപാത്രങ്ങളിലൂടെ കയ്യടി നേടിയ താരമാണ് ഷൈൻ ടോം ചാക്കോ. സഹസംവിധായകനായി ജീവിതം ആരംഭിച്ച ഷൈൻ പിന്നീട് അഭിനയത്തിലേക്കും തിരിയുകയായിരുന്നു. നിരവധി ചിത്രങ്ങളിൽ ചെറിയ വേഷങ്ങൾ അവതരിപ്പിച്ച ഷൈൻ പിന്നീട് ഇതിഹാസ എന്ന ചിത്രത്തിലൂടെയാണ് നായകനായി എത്തിയത്. ചിത്രം വൻ വിജയമായത്തിനൊപ്പം ഷൈനും ശ്രദ്ധിക്കപ്പെട്ടു. പിന്നീട് കമ്മട്ടിപ്പാടം ഒറ്റാൽ ഉൾപ്പടെയുള്ള ചിത്രങ്ങളിൽ മികച്ച അഭിനയ പ്രാധാന്യമുള്ള കഥാപാത്രവുമായും ഷൈൻ എത്തി.
ഇപ്പോൾ ഇതാ ഷൈൻ ടോം ചാക്കോ പുതിയ ചിത്രവുമായി എത്തുകയാണ്. പിറന്നാൾ ദിനത്തിൽ തന്നെയാണ് തന്റെ ഏറെ പ്രതീക്ഷ പുലർത്തുന്ന ചിത്രത്തിന്റെ പ്രഖ്യാപനവുമായി ഷൈൻ ടോം ചാക്കോ ഫേസ്ബുക്കിലൂടെ എത്തിയിരിക്കുന്നത്. തമി എന്നാണ് ചിത്രത്തിന് പേര് നൽകിയിരിക്കുന്നത്. നവാഗതനായ കെ. ആർ പ്രവീണാണ് ചിത്രം സംവിധാനം ചെയ്യുന്നത്. ചിത്രത്തിന്റെ ഷൂട്ടിംഗ് ജൂലൈ 15 ന് ആരംഭിക്കും. കോഴിക്കോടാണ് ചിത്രത്തിന്റെ പ്രധാന ലൊക്കേഷൻ.
ഷൈൻ ടോം ചാക്കോ ചിത്രത്തിൽ വളരെ വ്യത്യസ്തമായ ഗെറ്റപ്പിലാണ് ചിത്രത്തിൽ എത്തുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റർ വരും ദിവസങ്ങളിൽ പുറത്തിറങ്ങും. ചിത്രത്തിന്റെ വളരെ രസകരമായ പ്രഖ്യാപനമാണ് ഇന്ന് നടന്നത്. സന്തോഷ് സി. പിള്ളയാണ് ചിത്രത്തിന്റെ ഛായാഗ്രഹണം ഒരുക്കുന്നത്. വിശ്വജിത് തങ്കച്ചൻ ചിത്രത്തിന് സംഗീതം നൽകുന്നു. എഡിറ്റിംഗ് നൗഫൽ അഹമ്മദ് നിർവ്വഹിക്കുന്നു. ആർട്ട് അരുൺ വെഞ്ഞാറമൂട്. യുവതാരങ്ങളാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രം ഈ വർഷം അവസാനത്തോടെ തീയേറ്ററുകളിൽ എത്തും.
