ബോളിവുഡിലെ സൂപ്പർ താരങ്ങളിൽ ഒരാളായ ഷാരൂഖ് ഖാൻ ഇപ്പോൾ സിനിമയിൽ നിന്ന് കുറച്ചു കാലമായി മാറി നിൽക്കുകയാണ്. തുടർച്ചയായ പരാജയങ്ങളാണ് സിനിമയിൽ നിന്ന് ഒരു ഇടവേളയെടുക്കാൻ ഷാരൂഖ് ഖാനെ പ്രേരിപ്പിച്ചത്. ബോളിവുഡിന്റെ കിംഗ് ഖാൻ എന്നാണ് ഈ താരം അറിയപ്പെടുന്നത് തന്നെ. എന്നാൽ തൊട്ടു മുൻപത്തെ റിലീസായ സീറോ എന്ന ചിത്രവും കൂടി ദയനീയ പരാജയമേറ്റു വാങ്ങിയതോടെ ഒരു സ്വയം തിരുത്തലിനു സമയം നൽകാനായി ഷാരൂഖ് ഖാൻ മാറി നിൽക്കുകയാണ്. എന്നാൽ ഷാരൂഖ് ഖാൻ ഉടൻ തിരിച്ചു വരുമെന്നും ചില റിപ്പോർട്ടുകൾ പറയുന്നുണ്ട്. അത് ചിലപ്പോൾ തമിഴ് സംവിധായകൻ ആറ്റ്ലി ഒരുക്കുന്ന ആദ്യത്തെ ബോളിവുഡ് ചിത്രത്തിലൂടെ ആയിരിക്കുമെന്നും അല്ലെങ്കിൽ ബോളിവുഡിലെ ഹിറ്റ് മേക്കറായ രാജ്‌കുമാർ ഹിറാനി സംവിധാനം ചെയ്യുന്ന പുതിയ ചിത്രത്തിലൂടെയാവുമെന്നൊക്കെ വിവിധ ബോളിവുഡ് സിനിമാ മാധ്യമങ്ങൾ റിപ്പോർട്ട് ചെയ്യുന്നുണ്ട്. ഏതായാലും ഈ സമയത്തു സോഷ്യൽ മീഡിയയിൽ കൂടുതൽ സജീവമായ ഷാരൂഖ് ആരാധകരുമായി നടത്തിയ സംവാദത്തിൽ നൽകിയ ഒരു ഉത്തരമാണ് ശ്രദ്ധ നേടുന്നത്.
ജീവിതത്തില്‍ നഷ്ടങ്ങള്‍ സാധാരണമാണ്. കരിയര്‍ ഉപേക്ഷിക്കേണ്ട സമയമായോ എന്ന് ഒരു സൂപ്പര്‍ താരം എങ്ങനെ അറിയും, എന്നാണ് ഒരു ആരാധകൻ ഷാരൂഖ് ഖാനോട് ട്വിറ്ററിൽ ചോദിച്ചത്. അതിനു ഷാരൂഖ് ഖാൻ നൽകിയ മറുപടിയും ഏറെ രസകരമാണ്. മറുപടിയായി ഷാരൂഖ് പറഞ്ഞ വാക്കുകൾ ഇങ്ങനെ, അറിയില്ലല്ലോ. നിങ്ങള്‍ ഈ ചോദ്യം സൂപ്പര്‍താരത്തോടു ചോദിക്കൂ, നിര്‍ഭാഗ്യവശാല്‍ ഞാന്‍ രാജാവായിപ്പോയി. താന്‍ ഇനിയും സിനിമകള്‍ ചെയ്യുമെന്നും തന്റെ പുതിയ ചിത്രങ്ങളേതൊക്കെയെന്നു സമയം പോലെ ആരാധകരെ അറിയിക്കുമെന്നും അദ്ദേഹം പറഞ്ഞു.
