ഒരുപക്ഷെ ദുൽകർ സൽമാൻ ആരാധകർ ഇപ്പോൾ ഏറെ കാത്തിരിക്കുന്ന ചിത്രമേതെന്ന ചോദ്യത്തിന് ഇപ്പോൾ ലഭിക്കാവുന്ന ഉത്തരം ഒന്ന് മാത്രം. ദുൽകർ സൽമാന്റെ ആദ്യ ചിത്രം സംവിധാനം ചെയ്ത ശ്രീനാഥ് രാജേന്ദ്രൻ ഒരിക്കൽ കൂടി ദുൽഖറുമായി കൈകോർക്കുന്ന കുറുപ്പ് എന്ന ചിത്രം. കുപ്രസിദ്ധ പിടികിട്ടാ പുള്ളിയായ സുകുമാര കുറുപ്പിന്റെ ജീവിത കഥ പറയുന്ന ഈ ചിത്രം ഈ വർഷം അവസാനത്തോടെ ചിത്രീകരണം ആരംഭിക്കും എന്നാണ് സൂചന. ഇപ്പോഴിതാ ദുൽകർ സൽമാനുള്ള ജന്മദിന സമ്മാനം ആയി ഈ ചിത്രത്തിന്റെ പുതിയ പോസ്റ്റർ പുറത്തു വിട്ടു കഴിഞ്ഞു ഇതിന്റെ അണിയറ പ്രവർത്തകർ. ജിതിൻ കെ ജോസ് കഥ രചിച്ച ഈ ചിത്രത്തിന് തിരക്കഥയും സംഭാഷണങ്ങളും ഒരുക്കിയിരിക്കുന്നത് ഡാനിയൽ സായൂജ് നായർ, കെ എസ് അരവിന്ദ് എന്നിവർ ചേർന്നാണ്.
ഏതായാലും പുറത്തു വിട്ടു മിനിട്ടുകൾക്കകം ഈ ടൈറ്റിൽ പോസ്റ്റർ പ്രേക്ഷകരുടെ ശ്രദ്ധ നേടി കഴിഞ്ഞു. ദുൽകർ സൽമാൻ തന്നെയായിരിക്കും ഈ ചിത്രം നിർമ്മിക്കുകയും ചെയ്യുക എന്ന ഒരു റിപ്പോർട്ട് നേരത്തെ പുറത്തു വന്നിരുന്നു. സെക്കന്റ് ഷോ, കൂതറ എന്നീ ചിത്രങ്ങൾക്ക് ശേഷം ശ്രീനാഥ് രാജേന്ദ്രൻ ഒരുക്കുന്ന മൂന്നാമത്തെ ചിത്രമാണ് ഇത്. സെക്കന്റ് ഷോ എന്ന ചിത്രം , ശ്രീനാഥ് രാജേന്ദ്രൻ, ദുൽകർ സൽമാൻ, സണ്ണി വെയ്ൻ തുടങ്ങി അനേകം പേരുടെ അരങ്ങേറ്റ ചിത്രം ആയിരുന്നു. ഏതായാലും കുറുപ്പ് എന്ന ഈ ചിത്രത്തിൽ സുകുമാര കുറുപ്പായി മറ്റൊരു വിസ്മയിപ്പിക്കുന്ന പ്രകടനം കൂടി കാഴ്ച വെക്കാനാണ് ദുൽകർ സൽമാൻ വരുന്നത്. ദിലീപിനെ നായകനാക്കി രണ്ടു വർഷങ്ങൾക്കു മുൻപ് അടൂർ ഗോപാലകൃഷ്ണൻ ഒരുക്കിയ പിന്നെയും എന്ന ചിത്രത്തിലും സുകുമാര കുറുപ്പിന്റെ കഥയാണ് പറഞ്ഞത്.
