പൊറിഞ്ചു മറിയം ജോസ് എന്ന ജോജു- ജോർജ്- ചെമ്പൻ വിനോദ്- നൈല ഉഷ ചിത്രം നേടിയ മികച്ച വിജയത്തോടെ ഒരു വലിയ തിരിച്ചു വരവ് തന്നെയാണ് പ്രശസ്ത സംവിധായകൻ ജോഷി നടത്തിയത്. മോഹൻലാൽ, മമ്മൂട്ടി, ദിലീപ് എന്നിവരുടെ ഓപ്പൺ ഡേറ്റ് ഉള്ള ഈ മാസ്റ്റർ ഡയറക്ടർ അടുത്തതായി ഒരുക്കാൻ പോകുന്നത് മെഗാ സ്റ്റാർ മമ്മൂട്ടി നായകനാവുന്ന ഒരു ചിത്രം ആണെന്നാണ് സൂചന. ഒട്ടേറെ ഹിറ്റുകൾ മലയാള സിനിമാ പ്രേമികൾക്ക് മുന്നിൽ എത്തിച്ച ഈ കൂട്ടുകെട്ട് വീണ്ടും ഒന്നിക്കുന്ന ചിത്രത്തിന് തിരക്കഥ ഒരുക്കാൻ പോകുന്നത് സജീവ് പാഴൂർ ആണെന്ന റിപ്പോർട്ടുകളും വരുന്നുണ്ട്. ഔദ്യോഗികമായി സ്ഥിതീകരണം ഒന്നും വന്നിട്ടില്ല എങ്കിലും മമ്മൂട്ടി- ജോഷി- സജീവ് പാഴൂർ ചിത്രം ഉണ്ടാകും എന്ന് തന്നെയാണ് ആരാധകരുടെ പ്രതീക്ഷ.
തൊണ്ടിമുതലും ദൃക്‌സാക്ഷിയും എന്ന ഫഹദ് ഫാസിൽ- ദിലീഷ് പോത്തൻ ചിത്രം രചിച്ചു ഏറെ പ്രശംസ പിടിച്ചു പറ്റിയ എഴുത്തുകാരൻ ആണ് സജീവ് പാഴൂർ. അദ്ദേഹത്തിന്റെ അവസാനമിറങ്ങിയ ചിത്രമായ സത്യം പറഞ്ഞാൽ വിശ്വസിക്കുമോ വാണിജ്യ വിജയതോടൊപ്പം നിരൂപക പ്രശംസയും ഏറ്റുവാങ്ങിയ ചിത്രമായിരുന്നു. മമ്മൂട്ടി- ജോഷി ചിത്രം ഒരുക്കാൻ ഓഗസ്റ്റ് സിനിമാസ് പ്ലാൻ ചെയ്യുന്നത് ആയും സോഷ്യൽ മീഡിയയിൽ വാർത്തകൾ പരക്കുന്നുണ്ട്.
ന്യൂ ഡൽഹി, സംഘം, ധ്രുവം, നായർ സാബ് എന്നീ ഹിറ്റ് ചിത്രങ്ങൾ നമ്മുക്ക് സമ്മാനിച്ച മമ്മൂട്ടി- ജോഷി കൂട്ടുകെട്ട് അവസാനമായി ഒന്നിച്ചത് താര സംഘടനയായ ‘അമ്മ നിർമ്മിച്ച ട്വന്റി ട്വന്റി എന്ന മൾട്ടി-സ്റ്റാർ ചിത്രത്തിൽ ആണ്. തങ്ങളുടെ പഴയകാല ചിത്രങ്ങൾ പ്രേക്ഷകർക്ക് സമ്മാനിച്ച ആവേശം ഒരിക്കൽ കൂടി നല്കാൻ ആയിരിക്കും ഇനി വരാൻ പോകുന്ന പുതിയ ചിത്രത്തിലൂടെ ഈ കൂട്ടുകെട്ട് ശ്രമിക്കുക. മമ്മൂട്ടി ഇപ്പോൾ അഭിനയിച്ചു തീർന്നത് അജയ് വാസുദേവ് ഒരുക്കിയ ഷൈലോക്കിൽ ആണ്. സന്തോഷ് വിശ്വനാഥ്- ബോബി- സഞ്ജയ് ടീം ഒരുക്കുന്ന പൊളിറ്റിക്കൽ ഡ്രാമ ആയ വണ്ണിൽ ആണ് മമ്മൂട്ടി ഇനി ജോയിൻ ചെയ്യുക. തന്റെ ബ്രഹ്മാണ്ഡ ചിത്രമായ മാമാങ്കത്തിന്റെ ഡബ്ബിങ് പൂർത്തിയാക്കുന്ന തിരക്കിലാണിപ്പോൾ മമ്മൂട്ടി.
