ആദിയെയും പ്രണവ് മോഹൻലാലിനെയും അഭിനന്ദിച്ചു ഇതാ പുതിയൊരാൾ കൂടി രംഗത്ത്. പ്രശസ്ത സംവിധായകൻ റോഷൻ ആൻഡ്രൂസ് ആണ് ആ വ്യക്തി. ആദി കണ്ടു എന്നും ഒരുപാട് ഇഷ്ടമായെന്നും റോഷൻ ആൻഡ്രൂസ് പറയുന്നു. പ്രണവിന്റെ പെർഫോമൻസ് അതിഗംഭീരം ആയെന്നു വിശേഷിപ്പിച്ച റോഷൻ ആൻഡ്രൂസ്, ഈ ചിത്രം എല്ലാവരും കാണണം എന്നും പറഞ്ഞു. പ്രണവിന് ആശംസകളും അഭിനന്ദനങ്ങളും പറഞ്ഞു കൊണ്ടാണ് റോഷൻ ആൻഡ്രൂസ് തന്റെ ഫേസ്ബുക് പേജിൽ പോസ്റ്റ് ഇട്ടതു. ഇതിപ്പോൾ വിനീത് ശ്രീനിവാസൻ, ഷാജി കൈലാസ്, മഞ്ജു വാര്യർ, വി എ ശ്രീകുമാർ മേനോൻ, സാജിദ് യഹിയ , അരുൺ ഗോപി തുടങ്ങി ഒരുപാട് പ്രശസ്ത സിനിമാ പ്രവർത്തകർ പ്രണവിനും ആദിക്കും ആശംസകളും അഭിനന്ദനങ്ങളും അറിയിച്ചു രംഗത്ത് വന്നു കഴിഞ്ഞു.
ജീത്തു ജോസഫ് സംവിധാനം ചെയ്ത ഈ ചിത്രത്തിന്റെ ഹൈലൈറ്റ് പ്രണവിന്റെ ഇടിവെട്ട് ആക്ഷൻ രംഗങ്ങൾ ആണ്. കോരിത്തരിപ്പിക്കുന്ന ആക്ഷൻ രംഗങ്ങളോടൊപ്പം ത്രില്ലടിപ്പിക്കുന്ന മുഹൂർത്തങ്ങളും വൈകാരികമായ രംഗങ്ങളുമെല്ലാം നിറഞ്ഞ ഈ ചിത്രം യുവാക്കൾ മാത്രമല്ല ഇപ്പോൾ കുടുംബ പ്രേക്ഷകരും ഇരു കയ്യും നീട്ടി സ്വീകരിക്കുകയാണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ഈ ചിത്രം നിർമ്മിച്ചിരിക്കുന്നത്.
ആശീർവാദ് സിനിമാസിന്റെ ആദ്യ ചിത്രമായ മോഹൻലാൽ- ഷാജി കൈലാസ് ചിത്രം നരസിംഹം പുറത്തിറങ്ങിയത് 2000 ജനുവരി 26 നു ആണ്. മലയാളത്തിലെ ഇൻഡസ്ട്രി ഹിറ്റ് ആയി മാറിയിരുന്നു ആ ചിത്രം. ഇപ്പോഴിതാ പതിനെട്ടു വര്ഷങ്ങള്ക്കു ശേഷം മോഹൻലാലിൻറെ മകൻ നായകനായ ആദ്യ ചിത്രവും ആശീർവാദ് നിർമ്മിക്കുകയും അതേ ജനുവരി 26 എന്ന ഡേറ്റിൽ റിലീസ് ചെയ്തു ഇപ്പോൾ ബ്ലോക്ക്ബസ്റ്റർ വിജയം നേടുകയാണ്.
