തമിഴകത്തിന്റെ നടിപ്പിൻ നായകൻ സൂര്യയുടെ ആരാധകരും തെന്നിന്ത്യൻ സിനിമാ പ്രേമികളും ഇപ്പോൾ കാത്തിരിക്കുന്നത് സൂര്യയുടെ അടുത്ത ചിത്രമായ സൂരറൈ പോട്രൂവിന്റെ റിലീസിനാണ്. സുധ കൊങ്ങര രചിച്ചു സംവിധാനം ചെയ്ത ഈ ചിത്രം മാസ്സും ക്ലാസ്സുമാണ് എന്ന സൂചനകളാണ് ലഭിക്കുന്നത്. കരിയറിലെ അത്ര നല്ല ഒരു സമയത്തിലൂടെയല്ല സൂര്യ കടന്നു പോകുന്നത് എന്നത് കൊണ്ട് തന്നെ ഈ ചിത്രം ഒരു നടനെന്ന നിലയിലും താരമെന്ന നിലയിലും സൂര്യക്ക് വമ്പൻ തിരിച്ചു വരവ് സമ്മാനിക്കുമെന്നാണ് സിനിമാ ലോകവും പ്രേക്ഷക ലോകവും പ്രതീക്ഷിക്കുന്നത്. ഒരു ബയോഗ്രഫിക്കൽ ചിത്രമായതു കൊണ്ട് തന്നെ സൂര്യ എന്ന നടനെ ഏറ്റവും മികച്ച രീതിയിൽ ഉപയോഗിക്കുന്ന ഒരു ചിത്രവുമായിരിക്കും ഇതെന്ന പ്രതീക്ഷയും ആരാധകർക്കുണ്ട്. ഇപ്പോഴിതാ സൂര്യ അടുത്തതായി ചെയ്യാൻ പോകുന്ന ചിത്രത്തെ കുറിച്ചുള്ള വിവരങ്ങളാണ് വന്നിരിക്കുന്നത്. ഹരി സംവിധാനം ചെയ്യാൻ പോകുന്ന അരുവാ എന്ന ചിത്രത്തിലാവും സൂര്യ ഇനി അഭിനയിക്കുക.
ഈ ചിത്രത്തിലെ നായികാ വേഷം ചെയ്യുന്നത് പ്രശസ്ത തെന്നിന്ത്യൻ നടി രാശി ഖന്ന ആയിരിക്കുമെന്ന് സ്ഥിതീകരിച്ചു കഴിഞ്ഞു. നടി തന്നെയാണ് ഈ വിവരം സ്ഥിതീകരിച്ചിരിക്കുന്നതു. വേൽ, ആറു, സിംഗം, സിംഗം 2 , സിംഗം 3 എന്നീ ചിത്രങ്ങൾക്ക് ശേഷം സൂര്യ- ഹരി ടീം ഒന്നിക്കുന്ന ആറാമത്തെ ചിത്രമാണ് അരുവാ. ഏപ്രിൽ ഷൂട്ടിംഗ് ആരംഭിച്ചു ദീപാവലി റിലീസായി പ്ലാൻ ചെയ്ത ഈ ചിത്രം ഇനി അടുത്ത വർഷം മാത്രമേ പ്രദർശനത്തിന് എത്തിക്കാൻ സാധിക്കുകയുള്ളു. സുന്ദർ സി സംവിധാനം ചെയ്യുന്ന അരമനൈ 3 ലും അഭിനയിക്കുന്ന രാശി ഖന്ന തെലുങ്കിലും തിരക്കിലാണ്. കെ ഇ ജ്ഞാനവേൽ രാജയാണ് അരുവാ എന്ന ചിത്രം സ്റ്റുഡിയോ ഗ്രീനിന്റെ ബാനറിൽ നിർമ്മിക്കുന്നത്. അരുവാ കഴിഞ്ഞു സൂര്യ ചെയ്യാൻ പോകുന്നത് വെട്രിമാരൻ സംവിധാനം ചെയ്യുന്ന വാടി വാസൽ ആണ്.
