മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരനെ കുറിച്ച് കഴിഞ്ഞ ദിവസം പാൻ ഇന്ത്യൻ സൂപ്പർ താരം പ്രഭാസ് പറഞ്ഞ വാക്കുകൾ ആണ് സോഷ്യൽ മീഡിയയിൽ വൈറൽ ആവുന്നത്. തന്റെ പുതിയ ബ്രഹ്മാണ്ഡ റൊമാന്റിക് ചിത്രമായ രാധേ ശ്യാമിന്റെ പ്രൊമോഷനായി കേരളത്തിൽ എത്തിയപ്പോൾ ആണ് പ്രഭാസ് ചില വെളിപ്പെടുത്തലുകൾ നടത്തിയത്. താൻ ഇപ്പോൾ അഭിനയിച്ചു കൊണ്ടിരിക്കുന്ന, കെ ജി എഫ് സംവിധായകൻ പ്രശാന്ത് നീൽ ഒരുക്കുന്ന, സലാർ എന്ന ചിത്രത്തിലെ ഒരു നിർണ്ണായക വേഷം പൃഥ്വിരാജ് ചെയ്യുന്നു എന്നാണ് പ്രഭാസ് പറയുന്നത്. മാത്രമല്ല, രാധേ ശ്യാം എന്ന ചിത്രത്തിൽ കഥാവിവരണത്തിനായി പൃഥ്വിരാജ് തന്റെ ശബ്ദവും നൽകിയിട്ടുണ്ട് എന്നും പ്രഭാസ് വെളിപ്പെടുത്തി. ബ്ലെസ്സി ഒരുക്കുന്ന ആട് ജീവിതം എന്ന ചിത്രത്തിനായി ശരീര ഭാരം കുറക്കുന്ന തിരക്കിലാണ് പൃഥ്വിരാജ് ഇപ്പോൾ. ആട് ജീവിതത്തിനു വേണ്ടി മോഹൻലാൽ സംവിധാനം ചെയ്യുന്ന ബറോസിലെ അതിഥി വേഷവും ആഷിഖ് അബു ഒരുക്കാൻ പോകുന്ന നീലവെളിച്ചത്തിലെ നായക വേഷവും പൃഥ്വിരാജ് ഉപേക്ഷിച്ചിരുന്നു.
അതുകൊണ്ട് തന്നെ സലാർ എന്ന ചിത്രത്തിലെ കഥാപാത്രത്തിനായി പൃഥ്വിരാജ് ഇതുവരെ ഡേറ്റുകൾ നൽകിയിട്ടില്ല എന്നും റിപ്പോർട്ടുകൾ വരുന്നുണ്ട്. ഏതായാലും അണിയറ പ്രവർത്തർ പൃഥ്വിരാജ് സുകുമാരനുമായി ചർച്ചയിൽ ആണെന്നും അധികം വൈകാതെ ഒഫീഷ്യൽ പ്രഖ്യാപനം വന്നേക്കാം എന്നും വാർത്തകൾ സൂചിപ്പിക്കുന്നു. ശ്രുതി ഹാസൻ നായികാ വേഷം ചെയ്യുന്ന സലാർ, കന്നഡ- തെലുങ്കു ഭാഷകളിൽ ആണ് ഒരുക്കുന്നത്. കെ ജി എഫ് എന്ന ചിത്രം നിർമ്മിച്ചവർ തന്നെയാണ് സലാറും നിർമ്മിക്കുന്നത്. പ്രഭാസിന്റെ പുതിയ റിലീസ് ആയ രാധേ ശ്യാം മാർച്ച് പതിനൊന്നിന് ആണ് റിലീസ് ആവുക. പൂജ ഹെഗ്‌ഡെ ആണ് ഇതിലെ നായികാ വേഷം ചെയ്യുന്നത്.
